Garante Manan Iha Luro, Laletek : Partidu Seluk Tau Iha Bolsu Tu’u CNRT

SAPNewsTL, Lautem: Partidu Congresso Nacional Para a Reconstrução de Timor (CNRT) hala’o konsolidasaun no halo reajustamentu ba Partidu iha Postu Administrativu Luro, Munisipiu Lautem hodi tau forsa hamutuk fo vitoria ba CNRT iha eleisaun parlamentar 2023.

Iha Diskursu Vise Koordenador Munisipiu Lautem José dos Santos “Laletek” husu militante sira, joven sira labele hatudu oin de’it maibe tenke ho fuan ho laran no firmeza hodi konvense ema hotu atu hamutuk hodi fo vitoria ba CNRT

“Ita tenke firmeza labele mai hatudu oin de’it, tenke ho neon ho laran alin sira, futuru imi nian buka konvense inan aman para Luro ne’e vitoria, labele oin mai iha ne’e aban ba fali fatin seluk ida ne’e ita trai ita nia an”. Dehan Vise Koordenador CNRT Munisipiu Lautem José dos Santos “Laletek” iha nia diskursu ba konsolidasaun partidu CNRT iha Postu Administrativu Luro, Sábadu,1/04/2023.

Laletek hatutan nia hamrik la’os haruka atu ba  sobu partidu seluk tanba nia konsidera partidu hotu-hotu di’ak maibé atu salva nasaun ida ne’e nia husu atu vota ba CNRT hodi fo vitoria ba maun bo’ot Xanana  liu husi CNRT hodi salva nasaun ida ne’e.

“Agora ba halibur tan, bolu sira mai, bele belun, bele kamarada, para hamutuk hodi fo vitoria para maun bo’ot Xanana hadia nasaun, partidu ne’ebe imi tuir tau bolsu lai, agora hotu-hotu tuir CNRT para maun bo’ot Xanana lidera nasaun  ida ne’e”. Nia hameno

Iha fatin hanesan, Adjuntu Sekretearia Jeral Partidu CNRT Francisco da Costa Guterres ne’ebe destaka iha Munisipiu Lautem haktuir atu salva nasaun ida ne’e no hadia fali rai ida ne’e tenke fo fila ba maun Xanana liu husi partidu CNRT, atu labele husik nasaun ne’e iha perigu nia laran.

“Ita la bele husik rai ne’e la’o hanesan ne’e, entrega ba maun Xanana para kaer ukun ida ne’e, para hadia fali rai ida ne’e para hatuur fali ekonomia Timor ne’e la’o ho di’ak para husik hela buat di’ak ba jerasaun foun sira, ida ne’e mak importante tebes”. Nia hatete

Francisco fundamenta CNRT garante katak sei dezenvolve nasaun ida ne’e ho di’ak wainhira hamutuk ho Xanana  tanba ne’e nia husu atu rai di’ak tiha partidu no hamutuk ho maun Xanana hodi hadia ekonomia Timor Leste.

“Ha’u fiar katak ita sei dezenvolve rai ida ne’e ho di’ak kuandu ita hamutuk ho maun Xanana, atu salva nasaun ne’e atu rezolve krize ekonomiku, krize ne’ebe mak agora dadaun kona hela ba ita nia rai, ita nia rai ida ne’e ekonomikamente la viavel ona   tanba osan laiha, haluha tiha partidu,tau di’ak tiha partidu mai ita hamutuk vota ba maun Xanana liu husi CNRT atu rezolve problema sira ne’e”. Nia hakotu

Jornalista: Luis Pailofo