Aktu Oho Animal Iha Covalima, FJP Konsidera Administrador Haksoit Lutu

SAPNewsTL, DÍLI : Relasiona  ho aktu oho povu nia animál, liu husi Komunikadu Imprensa Forum Justisa Popular konsidera, aktu administrador Covalima ho nia komitiva ne’ebé oho povu nia animál iha postu administrativu Tilomar, ne’e ilegál, Tanba tuir lei higene públiku artigu-2, ambitu aplikasaun lei refere ba de’it sidade urbana

Estadu Timor-Leste Ukun-an Tinan-20 resin ona, Osan barak tebes mak governu gasta atu hadi’a rai ida-ne’e maibé nia rezultadu mak povu maioria sei terus, estrada sei aat, bee sei nalihun, baleta sei aat, lixu kintu-kantu, rai-rahun suar fatin-fatin, mal nutrisaun sura la hotu.

Forum Justisa Popular informa, Iha fulan-Agostu no Setembru liubá, Administradór Munisípiu Covalima ho komitiva implemeta Dekretu Lei nú. 33/2008 kona-ba Higene no Orden Publiku iha Postu Adminstrativu Tilomar Munisipiu Covalima sira implementa lei ne’e la hodi hadi’a baleta-kuak, rezolve estrada-aat, bee-nalihun, lixu no fatin públiku seluk ne’ebé hetan estragus no fo ameasa ba higene publiku. Maibé sira implemeta lei refere ho metodu haksoit lutu, hodi oho povu nia animál

“Implementa lei (Dekretu Lei nú. 33/2008) ne’e la hodi hadi’a baleta-kuak, rezolve estrada-aat, bee-nalihun, lixu no fatin públiku sira, Maibé sira implemeta lei refere ho metodu haksoit lutu, hodi oho povu nia animál lubuk ida hanesan karau, bibi no konsege mós hakanek karau hosi komunidade balun”. Dehan Porta Voz Forum Justisa Popular Paulus de Araujo ba Jornalista sira iha Jardim 5 de Maiu, kuarta (12/10/22).

Entretantu, iha Tilomar, karau no bibi ne’ ebé sira oho iha fulan Agostu liu ba, entrega ba prizaun no uma mahon Salele. Enkuantu, prizaun no uma-mahon hetan finansia hosi povu liu hosi orsamentu jerál estadu

“Tanba sá mak oho tiha povu nia animál fó tan ba instituisaun sira ne’ebé hetan osan hosi povu ho montante ne’ebé boot, tanba sá, em nome sidade urbana tenki oho. Suai no Tilomar ne’e kategoria sidade urbana Ka keta suai ne’e, naran de’it mak sidade urbana maibé la priense kritéria hanesan sidade urbana, La’ós iha ne’e de’it, iha operasaun illegál ne’e mós, administradór ho nia kominitiva involve komunidade lubuk ida-ne’ebé iha poténsia boot hamosu konflitu horizontal uma-mane no mane-foun ka seluk tan”.Dehan Nia.

Forum ne’e konsidera, aktu administrador Covalima ho nia komitiva ne’ebé oho povu nia animál iha postu administrativu Tilomar, ne’e ilegál, Tanba tuir lei higene publiku artigu-2, ambitu aplikasaun lei refere ba de’it sidade urbana. Tanba ne’e, aplika lei refere iha Postu Administrativu hanesan Tilomar, ne’e kategoria krime

“Ami konsidera, Administrador Covalima ne’ebe hatun despaixu hodi interpreta haluhan ámbitu aplikasaun ba lei higene publiku ba to’o kapitál postu administrativu hanesan Tilomar, Fatumea, Fohorem, no Suai-Vila iha fulan Agostu no Setembru , ne’e hamosu problema juridiku ne’ebe grave, tanba viola artigu 3 lei higene no orden publiku ” Hato’o nia

Entretantu, Tuir artigu refere, se povu nia animál iha sidade urbana, dala ida tan iha sidade urbana kontra lei refere sei hetan de’it sansaun koima ka denda ho montante osan dollar-lima (5) too dolar atuslima (500) tuir kapasidade finansiál animal na’in. Maibé lei la fó dalan atu oho.

FJP salienta, Desizaun ne’e la ós de’it kontra lei Higene no orden públiku, maibe la Valoriza valór kulturál ne’ebe moris, buras no abut metin tebes iha area refere hahu kedas hosi bei-ala nia tempu.

Forum Justisa Populár eziji Administrador ho komitiva tenki selu fali povu nia animál ne’ebe sira oho iha area rurál Postu Administrativu Tilomar no suai ne’ebe substansialmente la tama kategoria sidade urbana, Hafoin selu, administrador ho komitiva tenki husu deskulpa ba povu, liu-liu hirak ne’ebe nia animál sira oho iha fulan rua liu ba.

“Tuir artigu 13 Lei Higene no Ordem Publiku, ami eziji ba ministeriu estatal atu fó pena ba administrador ho komitiva hodi selu imediata povu nia animál ne’ebé sira oho ho dalan illegál, Husu mos ba ministeriu públiku atu loke investigasaun ba aktus adminstrador Munisipiu Covalima ho komitiva ne’ebe oho povu nia animal”. Tenik Porta Voz

Enkuantu, animal hirak ne’ebe mak autoridade munisipiu Covalima sira oho iha  Suku Lalawa, pertensia Aldeia Ai-Oan, mai diresaun sulu maudeiu nian iha area rural iha karau 2 mate no karau 2 seluk kanek to’o latama nia fatin no animal halai lakon sai fuik,  bibi 6 mak sira oho hodi entrega fila fali ba uma mahon no prizaun.

Jornalista : Antonio Tilman & Absalaun Da Costa

Editor      : Ekipa Editorial