APFTL Halo Tinan 8, Pe. Mariano : Halo Di’ak Tenki Hahú Husi Ki’ik

SAPNewsTL, Dili : Alumni Parlamentu Foinsa’e Timor-Leste (APFTL) Selebra Loron Aniversáriu ba dala VIII, iha Misa Agradesimentu Pe. Mariano Quintão do Rego hateten APFTL hamrik ona tinan 8, Parabéns ba imi hotu, imi tenki moris ho lialos no halo diak hodi servi komunidade ho espíritu patriotizmu, sivizmu no ativizmu

Missa Agradesimentu ba selebrasaun Aniversariu APFTL nian ba dala-VIII ne’e hala’o iha Kapela St. Antonio Kampo Alor Dili, 26/08/2023

Pe. Mariano Quintão do Rego haktuir, se hanoin halo diak hahu husi kiik to’o boot, hahu husi ida-idak nia an ba grupu no nasaun, aban bainrua imi sei simu buat ne’ebé diak barak no susesu liu tan iha futuru

“Maluk APFTL Sira, se ita hanoin halo di’ak, halo de’it husi kiik to’o boot, halo hahu husi ita nia an rasik ba grupu no nasaun, aban bainrua ita sei hetan diak, ita halo buat ne’ebe diak iha ita nia an, nia sei dezenvolve an no krese liu tan no sei simu diak barak liu tan katak ita tenki moris ho verdade no Lialos”. Tenik Pe. Mariano Quintao do Rego liu husi nia Omilia

Padre Selebrante ne’e hatutan, ema ne’ebe hamtauk Maromak nia sei hetan bensaun tanba ne’e imi tenki hadomi ema seluk hanesan imi nia an no hadomi Na’i Maromak liu sasan hotu hotu

“Ita tenki hadomi ema seluk hanesan ita nia an no hadomi Na’i Maromak liu sasan hotu hotu, se ita hakarak sai boot, ita tenki sai atan hodi Serví ho espíritu Patriotizmu, Civizmu no ativizmu”. Nia subliña

“APFTL ohin moris ona ho tinan 8, Parabéns ba imi hotu, imi tenki buras ho Patriotizmu, sivizmu no ativizmu, ita nia presenza ne’e tenki haketak buat los no lalos, ita labele lori susar ne’ebe afeta ba Família, Komunidade no Nasaun”. Nia hatete

Nia akresenta, “Hirak ne’ebe haraik an, maromak sei hahi nia, ema ne’ebe foti an Maromak sei hatun nia, halo buat hotu tuir ita nia kapasidade, se ita labele, Entrega ba Maromak tanba nia mak bele fo no kuidadu buat hotu iha mundu”.nia dehan

Enkuantu, Alumni Parlamentu Foinsa’e Timor-Leste (APFTL) hari’i husi Eis Membru Parlamentu Foinsa’e iha loron 26 Agustu 2015 no ohin (26/08/2023) APFTL halo tinan ba dala VIII ho nia membru atual hamutuk 394 kompostu husi Feto 197 no Mane 197 reprezenta na’in 6 husi kada Postu Administrativu sira iha territóriu nasionál

Iha misa agradesimentu ne’e hetan partisipasaun maksimu husi husi membru sira feto no mane ne’ebe hela iha kapitál Dili, hafoin misa agradesimentu APFTL mos sei kontinua halo atividade han hamutuk hodi selebra ninia existênsia ba dala VIII iha Timor Leste

Jornalista : Marcela Mery da Costa