Apoia SEATOU Halo Eviksaun, José Prontu Fila Ba Foho
SAPNews TL, Dili : Sekretaria Estadu Asuntu Toponomia no Organizasaun Urbanu (SEATOU) ho ekipa kontinua halo eviksaun ba okupante espasu públiku iha area Terminal Bekora.
Durante eviksaun, Komunidade sira ne’ebe okupa espasu públiku ho laran koopera ho SEATOU liu husi aruma sira nia sasan sira hodi husik hela fatin.
Komunidade José dos Santos Belo konsidera normal governu halo despezu administrativa tanba ho hanoin hakarak hadia sidade Dili no lori desenvolvimentu ba nasaun.
“Ami apoia governu hodi halo eviksaun, apoia tanba hakarak governu hadia sidade Dili, maske ha’u hela tinan tolunulu ona maibe ha’u simu tanba ne’e atu lori desenvolvimentu”. Tenik Komunidade José dos Santos Belo ba SAPNews iha Bekora, 24/04/2024
Jose dos Santos Belo konta, tanba funu deside halai mai hela iha Dili maibe se governu hakarak hadia desemvolvimentu nasaun, hanesan sidadaun simu desizaun ne’ebe governu foti.
“Tanba funu, ema atu oho mak uluk ami halai mai hela iha Dili, maibe tanba governu hakarak hadia desenvolvimentu, ami simu ho laran hodi husik hela fatin”. Jose dos Santo Belo haktuir
Sidadaun José dos Santos Belo ho idade 62 husi Postu Administrativu Laga, Munisipiu Baukau ne’e prontu fila ba foho, nia konsidera iha foho ne’e diak liu tanba bele halo to’os no natar hodi faan no hetan osan.
“Prontu fila ba foho, ha’u sente hela iha foho ne’e diak liu tanba bele halo to’os no natar hodi faan iha merkadu”. Nia dehan
Iha despezu administrativa ne’e, ekipa SEATOU tun ho ekipamentu pezadu hanesan Eskavator no Loder hodi sobu uma hirak ne’ebe identifikadu okupa rai estadu.
Governante ne’e mos hetan seguransa maximu husi Membru FALINTIL- Forsa Defeza Timor Leste (F-FDTL), Polisia Nasionál Timor Leste (PNTL) no guarda munisipal.
Antes ne’e, SEATOU halo ona eviksaun ba komunidade sira iha Merkadu Bidau, Area Tasi-Ibun Metiaut, Komunidade uma kain 21 iha aitarak laran no merkadu antigu comoro.
Tuir planu ekipa SEATOU sei halo mos eviksaun ba komunidade sira ne’ebe okupa rai estadu iha area tasi-tolu inklui bairo pite.
Jornalista : Ekipa Kobertura
