Tolok Germano ! Seguransa SEATOU Baku Joven Iha Bekora
SAPNews TL, Dili : Wainhira Sekretaria Estadu Asuntu Toponomia no Organizasaun Urbanu (SEATOU) ho ekipa hala’o eviksaun ba okupante espasu públiku iha area Terminal Bekora, SEATOU Germano Santa Brites hirus joven mane ida tanba hasai liafuan tolok
Durante eviksaun, Guarda Munisipiu ho karreta estadu ida halai tuir dalan hodi hakilar no avizu ho liafuan sobu, sobu no
sobu ba Komunidade sira ne’ebe okupa espasu públiku iha area terminal Bekora.
Iha tempu ne’e, SEATOU ho ekipa la’o tuir dalan fo avizu ba komunidade sira ne’ebe okupa espasu públiku hodi bele fo espasu ba ministériu obras públikas hodi halo dezenvolvimentu.
Iha biban ne’ebe SEATOU fo avizu maka hetan liafuan tolok husi joven mane no mosu desintendimentu, ikus mai SEATOU ho hirus hasoru joven mane ne’e dehan “Ha’u mai fo avizu, o hasai liafuan tolok ba ha’u, ha’u hateten o, o la jagoan iha rai ida ne’e ida, o beik, ha’u la mai tolok o, rona”. Dehan SEATOU Germano Santa Brites ho emosional iha Bekora, 24/04/2024
Hafoin hasai liafuan ne’e, Seguransa SEATOU ne’ebe hatai faru ho marka CSP ne’e tuku joven mane ne’e no polísia asegura joven mane ne’e.
Tuir observasaun SAP News iha terenu nota katak, wainhira akontese desintendimentu ne’e iha dalan sa’e ba fatuahi nian, guarda munisipal no PNTL sira ne’ebe iha area terminal bekora halai sa’e ba leten hodi halo intervensaun iha lokal desintendimentu.
Hafoin desintendimentu ne’e mosu, situasaun normal hikas tanba hetan seguransa husi parte PNTL, F-FDTL no guarda munispiu Dili.
Iha sorin seluk, José dos Santos Belo apoia governu ba despezu administrativa tanba hakarak hadia sidade Dili no lori desenvolvimentu ba nasaun.
“Ami apoia governu hodi halo eviksaun, apoia tanba hakarak governu hadia sidade Dili, maske ha’u hela tinan tolunulu ona maibe ha’u simu tanba ne’e atu lori desenvolvimentu”. Tenik Komunidade José dos Santos Belo ba SAPNews iha Bekora, 24/04/2024
Iha despezu administrativa ne’e, ekipa SEATOU tun ho ekipamentu pezadu hanesan Eskavator no Loder hodi sobu uma hirak ne’ebe identifikadu okupa rai estadu hamutuk sanulu resin sia (19) kompostu husi uma no baraka komunidade.
Governante ne’e mos hetan seguransa maximu husi Membru FALINTIL- Forsa Defeza Timor Leste (F-FDTL), Polisia Nasionál Timor Leste (PNTL) no guarda munisipal.
Antes ne’e, SEATOU halo ona eviksaun ba komunidade sira iha Merkadu Bidau, Area Tasi-Ibun Metiaut, Komunidade uma kain 21 iha aitarak laran no merkadu antigu comoro.
Tuir planu ekipa SEATOU sei halo mos eviksaun ba komunidade sira ne’ebe okupa rai estadu iha area tasi-tolu inklui bairo pite.
Entretantu, kona ba pessoal seguransa ne’ebe baku joven mane ne’e, konsidera krime ka la krime, SAP News TL tenta atu halo konfirmasaun husi Provedor Diretus Humanus e Justisa (PDHJ) Vírgilio Guterres Lamukan maibe seidauk konsege tanba sei okupadu ho servisu seluk.
Jornalista : Ekipa Kobertura