Asian Para Games Iha China, CPNTL & MJDAC Lansa Preparasaun Ba Atleta Sira
SAPNewsTL, Dili: Komite Paralímpiku Nasional Timor-Leste (sigla Português CPNTL) ho Ministériu Juventude Desportu Arte Kultura sigla Portugues (MJDAC) halo ona lansamentu ba atleta sira ne’ebe sei kompete iha Asian Para Games iha sidade Hangzhou, China iha fulan outubru tinan ne’e.
“Ha’u kontente ohin mai halo lansamentu preparasaun atleta sira partisipa Asian Para Games iha fulan Outubru tinan ne’e, Ha’u hatene atleta sira iha training center la masimu tanba halo preparasaun fulan ida deit maibe bele fortifika servisu ekipa nian reprezenta Timor-Leste iha Asian Para Games iha China tanba ita prepara ba prestasaun no hatudu Timoroan mos bele”, dehan Ministru Juventude Desportu Arte Kultura Nelio Izaac Sarmento ba jornalista sira iha salaun otel vila verde, Dili segunda (28/08/2023).
Nelio hatutan, governu agora tenki rezolve problema governu anterior husik hela maibe dalan uniku mak atleta sira tenki reprezenta Timor-Leste ba kompetisaun internasional sira
Nune’e, hein katak ba Asian Para Games 2023 ida ne’e atleta sira husi modalidade para atletizmu, para tenis meza no para hit besi bele hakas an no kompete ho esforsu tuir kapasidade
Ministru ne’e husu ba atleta sira foku halo preparasaun tanba sira tenki ba kompete duni iha Asian Para Games hodi hatudu prestasaun iha China, rezultadu ikus mak hatudu bele ka labele no hatudu duni katak ba kompete reprezenta nasaun hodi hamorin nasaun nia naran iha kompetisaun internasional sira
Iha fatin hanesan, Sekretariu Jerál CPNTL Jose da Silva Monteiro hatete, ohin sira halo lansamentu preparasaun atleta Timor-Leste ne’ebe sei partisipa iha Asian Para Games, daudaun ne’e sira prepara atleta hamutuk nain 11 atu hela training center durante loron 49.
“Ohin ita halo lansamentu ba atleta Timor-Leste partisipa Asian Para Games iha sidade Hangzhou China iha fulan Outubru 2023, tan ne’e ami prepara ona atleta sira husi federasaun para atletizmu, tenis meja no hit besi ba kompete iha Asian Para Games iha sidade Hangzhou, China”.
“Nune’e atleta sira hamutuk 11 ho treinador tolu mak sei hela training center durante loron 49 hodi halo preparasaun”, tenik Jose
Jose informa tan, delegasaun hamutuk 25 mak sei ba partisipa Asian Para Games iha China tinan ne’e kompostu husi atleta nain-11, treinador nain tolu, ofisial no xefi delegasaun sira, nia parte hein katak atleta sira sei unidade hodi hatudu prestasaun diak iha China
Iha sorin seluk, atleta para atletizmu Teofilo Freitas fo agradese ba governu bele oferese training center ba sira no prepara ba kompete Asian para Games
“Ha’u fo agradese ba ita nia governu bele oferese training center ba ami durante loron 49 hodi kompete Asian Para Games iha sidade Hangzhou, China tinan ne’e tuir kbiit ho forsa ami nian tanba eventu ne’e la fasil ba ami maibe ami sei esforsu hodi luta makaas tanba hetan ona konfiansa husi nasaun”, Teofilo hateten
Entretantu, ba preparasaun atleta sira partisipa Asian Para Games tinan ne’e governu aloka orsamentu montante 59, 430 USD, total atleta halo preparasaun hamutuk nain 11 ho treinador 3 , husi modalidade para atletizmu, hit besi no tenis meza.
Reportajen: Augusto dos Santos