Abertura Taça Esperança 2023, ES Nicolau & SACROJES Prontu Hadau Vitória
SAPNewsTL, Dili : Ensinu Sekundaria Nicolau Lobato ho eskola Sekundaria Sagrado Coração de Jesus (SACROJES) prontu hadau malu vitoria iha jogu abertura Taça Esperança 2023 hala’o iha kampu demokrasia, loron 30 fulan agostu 2023.
“Ami hasoru eskola SACROJES iha jogu abertura Taça Esperança iha loron 30 fulan agostu tinan ne’e ami esperansa boot katak sei manan iha jogu ne’e”, dehan Treinador ES Nicolau Lobato Atansio Pinto ba jornalista sira liu konferensia imprensa iha salaun City 8 Manleuana, Dili domingu 27/08/2023
Atanasio hatutan, sira halo ona preparasaun sufsiente kuaze fulan ida resin tanba hahu iha São Pedro Cup to’o iha Sao Miguel Cup no sira sei kontinua treinu nafatin para kompete tasa ne’e maske sira hetan difikuldade maibe nafatin iha esperansa katak sei manan kontra adversariu SACROJES iha jogu dahuluk
Iha fatin hanesan, Treinado Eskola SACROJES Balzano Mateus Gonzaga hatete, sira husi SACROJES prontu atu kompete ho adversariu liu-liu eskola Nicolau Lobato iha jogu abertura Taça Esperança 2023 hodi hadau malu vitoria maske ladun iha perparasaun ne’ebe mak efetivu.
“Ami husi eskola SACROJES prontu atu kompete ho adversariu sira liu-liu eskola Nicolau Lobato iha jogu abertura Taça Esperança 2023 hodi hadau malu vitoria maske ladun iha preparasaun mak efetivu tanba ami foin simu konvite husi komisaun organizador Taça Esperança iha semana tolu ba kotuk hanesan ne’e maibe espera katak jogador sira bele hatudu jogu ne’ebe diak iha eventu ida ne’e” tenik Balzano
Balzano informa tan, kona-ba tekniku ne’e jogador sira nian maibe nu’udar ekipa sira prontu atu kompete nune’e nia garantia jogador sira bele halo buat diak iha kampu laran.
Entretantu Taça Esperança 2023, ofisialmente dada ona sorteiu no liu husi sorteiu ne’e Eskola Sekundariu Nicolau Lobato sei kontra eskola SACROJES iha jogu abertura iha loron 30 fulan agostu 2023
Iha dada sorteiu eskola sekundaria 16 kompete iha Taça Esperança fahe ba grupu haat, iha grupu A kompostu husi ESG Nicolau Lobato Tasi Tolu, ES Sagrado Coração de Jesus Becora , ES Cafe Taibessi ho ES Sta. Madalena Canossa Manleuana
Iha grupu B kompostu husi ESG 12 de Novembro Becora, ES São Pedro Comoro, ES Externato São José ho ESTV EEC Becora,
iha grupu C kompostu husi ESG 5 de Maio Becora, Colegio São Miguel Arcanjo, Colegio São José Operario Balide ho ESG 4 de Setembro
Iha grupu D kompostu husi Colegio São Paulo VI, ES Cristal, ES An-nur no ESG Herois da Patria
Taça Esperança 2023 sei komesa iha loron 30 fulan agostu to’o 30 fulan setembru 2023 no kompetisaun ne’e realiza tanba hetan suportasaun masimu husi patrosinador sira hanesan ETO, GOTA, KTON no BRITAS.
Reportajen: Augusto dos Santos