Assalam Halakon Emmanuel FC Ho Skore 1-0

SAPNewsTL, Dili: Assalam FC manan mihis Emmanuel FC ho skore 1-0 iha divizaun dahuluk Liga Timorense epoka 2023 hodi hetan pontu tolu iha jornada dahuluk.

Jogu Assalam FC kontra Emmanuel FC hala’o iha Estadium Munisipal Dili tersa (21/02/2023).

Iha jogu parte dahuluk ekipa rua tun ho jogador line up ne’ebe klube rua tau fiar ona atu hala’o jogu hodi hetan vitoria ne’ebe jogu kick off ekipa rua halo inisitiva hodi halo presaun no atake ba malu maibe to’o minutu 45 remata la iha jogador ida husi ekipa rua ne’e marka golu ne’e skore mantein 0-0.

Kontinua ba jogu parte daruak treinador husi ekipa rua ne’e monta estratejia foun para manan jogu ne’e, iha jogu parte daruak ekipa rua nafatin lansa presaun no atake ba malu hodi hasa’e ritmu jogu anima tebes adeptu sira ne’ebe to’o minutu 73 jogador Hasan Costa husi Assalam FC konsege marka golu ne’ebe halo baliza Emmanuel FC la asegura nia redi hodi nakdoko tiha muda kedas skore ba 1-0.

Minutu 17 ikus ekipa tenta atu aumenta tan golu maibe la konsege ne’ebe to’o minutu 90 remata skore nafatin 1-0 hodi rezulta Assalam manan Emmanuel FC ho skore 1-0 ne’ebe ho rezultadu ne’e Assalam hadau pontu tolu iha jornada dahuluk divizaun dahuluk Liga Timorense epoka ne’e.

Depois jogu remata treinador Assalam FC Gaspar Soares sente orgullu tanba jornada dahuluk ekipa konsege manan no hetan pontus tolu

“Jornada dahuluk ne’e jogu importante tebes ne’ebe ha’u dehan ba hau nia jogador sira tenki dixiplina para rekolla pontu tolu ne’ebe ohin iha jogu parte dahuluk sira halo failansu oituan maibe tama jogu parte daruak, ha’u kontente tanba sira halo jogu tuir hau nia hakarak dixiplina diak liu tan”, tenik Gaspar

Gaspar hatutan, ohin jogador sira halo falla tanba iha espiritu jogu maibe la kreativu ne’ebe nia hatama fali jogador suplente sira ne’ebe nia hatama jogador Hasan da Costa marka duni golu ida jogu tuir mai sei hadia diak liu tan ba falla iha jogu ohin para hasoru AS Ponta Leste tanba klube ne’e ekipa ne’ebe forsa tebes

Iha fatin hanesan asitente treinador Emmanuel FC Van Basten hatete, normalmente futebol mak hanesan, ohin sira lakon tenki simu sorte iha mak empata

“Normalmente iha futebol mak hanesan ne’e, iha sorti mak ita empata, ohin ami lakon tenki simu ida ne’e tanba ohin ami nia jogador halo failansu maibe ne’e jogu dahuluk sei hadia ba jogu hitu tuir tan mai.

Basten aumenta tan, ohin hotu-hotu haree sira domina bola maibe maibe rezultadu mak determina ohin sira lakon pontu tolu maibe sira sei hadia para hetan fali pontu tolu.

Reportajen: Augusto dos Santos