Atleta Karate-do Na’in 24 Sei Kompete Iha “Bupati Belu Cup” Atambua
SAPNewsTL, Dili : Atleta nain-24 husi Federasaun Karate-Do Timor-Leste (FEKATIL) sei kompete kompetisaun “Bupati Belu Cup” iha Atambua semana ne’e.
“Ohin ita nia atleta sira sei aranka ba Atambua, NTT hodi tuir kompetisaun Bupati Belu Cup tanba hetan konvite ofisial, kompetisaun ne’e rasik sei partisipa husi federasaun barak iha Indonesia no ita nia atleta preparadu ona atu kompete kompetisaun ne’e reprezenta FEKATIL hamutuk nain-24 feto mane husi kadet to’o senior ho ofisial no treinador nain rua”, dehan Prezidente FEKATIL Filomeno Soares de Araújo ba jornalista sira iha edifisiu CDTL Caicoli, Dili segunda (23/10/2023).
Prezidente hatutan, atleta sira ne’ebe ba partisipa ne’e esforsu tomak husi FEKATIL liu husi organizasaun Shotokan ho Kusinryu no hetan suporta masimu husi atleta sira nia inan aman no kompania privadu balun iha Timor-Leste
Iha fatin hanesan, atleta Lucas da S. L. Kefi hatete, sira iha ona preparasaun nune’e ba atu kompete maibe rezultadu jogu hotu mak hare’e maibe nia iha tarjetu hakarak sai manan nain dahuluk.
“Tuir ami atleta rasik, ami iha ona preparasaun nune’e ami ba atu kompete rezultadu jogu remata mak ita hare’e maibe hau rasik iha tarjetu atu sai manan nain dahuluk iha Bupati Belu Cup iha Atambua ne’e”, tenik atleta
Ohin antes atleta ho ofisial nain-26 atu aranka ba tuir kompetisaun Bupati Belu Cup iha Atambua, NTT, sira hasoru malu ho estrutura CDTL hala’o despedida.
Reportajen: Augusto dos Santos