FSN Perisai Diri TL Realiza Kampionatu Nasional 2023
SAPNewsTL, Dili: Familia Silat Nasional (FSN) Perisai Diri Timor-Leste (TL) realiza kampionatu nasional 2023 partisipa husi atleta sira husi munisipiu sanulu.
“Ohin ita realiza kampionatu nasional FSN Perisai Diri Timor-Leste ba daruak iha 2023, ita nia atleta partisipa kampionatu ne’e hamutuk atus ida resin kategoria joven to’o senior husi munisipiu 10, orsamentu sira apoiu ba kampionatu nasional ne’e ho montante 18,000 USD suporta husi governu liu husi KRAM”, dehan prezidente FSN Perisai Diri Timor-Leste Leonardo Beningo Tilman ba jornalista sira iha salaun Unital Becora, Dili segunda (23/10/2023).
Prezidente hatutan, sira mos prepara premiu ba manan nain sira no sei prepara training center ba manan nain sira atu prepara sira ba kompete kampionatu nasional Federasaun Silat Nasional Timor-Leste (FESTIL) iha fulan novembru tinan ne’e
“Hakarak fo obrigadu ba governu liu husi KRAM tanba suporta ona fiananseiru ba sira hodi realiza kampionatu ne’e, fo obrigadu mos ba komisaun nasional servisu makaas ona realiza kampionatu ne’e hamutuk ho treinador no atleta sira no durasaun kampionatu nasional ne’e durante loron rua iha loron 23 to’o 24 fulan outubru 2023”.
Iha fatin hanesan, Ministru Juventude Desportu Arte Kultura (MJDAK) Nelyo Isaac Sarmento hatete, kampionatu nasional ne’e hanesan fatin ba kuriji ho hare’e atleta kualifikadu tan ne’e nia fo parabens ba atleta sira partisipa kampionatu nasional FSN Perisai Diri Timor-Leste ne’e.
“Kampionatu Nasional ne’e mos hanesan fatin ba kuriji katak treinador sira hare’e sira nia atleta durante treinu nia rezultadu diak ona ka Lae? Karik seidauk atleta seidauk diak treinador iha responsabilidade atu fo treinu tan hodi kompete tan”.
Hare’e atleta kualifikadu no ha’u fo parabens ba atleta sira kontente ho partisipa iha kampionatu nasional FSN Perisai Diri Timor-Leste tanba atleta ida rua sai atleta kualifikadu husi modalidade ne’e sei reprezenta Timor-Leste ba jogu internasional sira tanba ita nia governu sempre prontu apoiu hodi lori Timor-Leste ba prestasaun diak iha area desportu inklui modalidade arte marsial”, tenik Nelyo
“Ha’u foti mensajen filozofia FSN Perisai Diri Timor-Leste nian atu ema hotu halo tuir mak atu hadia mentalidade no vida espiritual, kapasidade iha arte diak maibe la ho espiritual ita aprende buat hotu saugati tanba la iha filozofia iha ita nia an atu respeita ema seluk hanesan ita nia an rasik maibe ita arte diak ho espiritual ita iha responsabilidade boot respeita ema seluk hanesan ita nia an rasik.”.
Nia afirma tan, atleta sira partisipa kampionatu ne’e iha oportunidade boot atu reprezenta Timor-Leste ba jogu internasional sira inklui jogu Sea Games 2025 iha Tailandia, nune’e enkoraja FSN Perisai Diri Timor-Leste atu dezenvolve an nafatin ba oin forma joven sira kualifikadu iha pratika arte marsial nian ho mentalidade diak moris iha sosiedade.
Entretantu, atleta sira husi munisipiu sanulu partisipa kampionatu nasional FSN Perisai Diri Timor-Leste ne’e maka husi munisipiu Lautem, Baucau, Viqueque, Manatuto, Dili, Aileu, Ainaro, Ermera, Bobonaro no RAEOA.
Reportajen: Augusto dos Santos