Autoriedade Lokal Apoia ! Guvernu Taka Atividade GAM & GAR
SAPNewsTL, Bobonaru : Durante vizita Primeiru-Ministru (PM), Kay Rala Xanana Gusmão iha Sede Suku Lourba no Suku Carabau, Postu Administrativu Bobonaro, Munisipiu Bobonaro, Autoriedade Lokal sira apoia Guvernu taka atividade Grupu Arte Marsial (GAM) no Grupu Arte Ritual (GAR) hodi bele prevene konflitu sira ba futuru.
Hafoin rona tiha husi Komunidade no Autoriedade Lokal sira kona ba kazu konfrontu entre arte marsial no ritual sira iha Suku Lourba, Xefe Governu Xanana ho hirus promete ba populasaun sira katak, iha semana ne’e Governu liu hosi Reniaun Konsellu Ministru sei hasai rezolusaun ida hodi taka atividade Arte Marsiál (GAM) no Grupu Arte Rituál (GAR).
“Konsellu Ministru sei deside atu taka kedas atividade Arte Rituál no Arte Rituál, tanba ha’u la permite, se povu ne’e funu no mate iha funu laran, agora ita ukun aan, joven sira mosu mai oho malu bebeik, ida ne’e sei la akontese tan,” dehan PM Xanana durante dialogu iha Suku Lourba, Postu Bobonaru, 04/11/023
Iha sorin seluk, Xefe Suku Carabau Manuel Noronha no Xefe Suku Cotaboot, Miguel Gonsalves informa problema ne’e interna entre joventude Suku Lourba no Carabau nian, ikus mai halo povu rua mak sai vitima.
Nune’e, Autoridade lokal ne’e aseita atu governu taka grupu arte marsiál no arte rituál hotu hamenus konflitu mosu bebeik.
“Ami mós aseita atu taka tiha grupu arte marsiál ne’e, tanba ami mós lakohi terus,” nia hatete.
Hafoin rona tiha deklarasaun ne’e, PM Xanana husu atu Komandu PNTL investiga klean grupu rua ne’ebé envolve iha konflitu hodi realiza kedas dialogu para labele akontese bebeik konflitu.
Xefe Governu husu atu juventude sira tenki halo reflesaun atu labele monu ba tensaun aat hodi komete krime sunu povu inosente sira nia uma.
“Apa, ama no liurai sira, ha’u mai hosi Lourba hateke ba mai too iha ne’e (Carabau) ha’u hakfodak, ami la’o haree uma balun sunu, estraga. Ha’u husu boot ba imi para ona atu estrega malu, tanba sira iha sorin Lourba, prepara atu imi bele ba dame malu,”PM apela.
Entretantu, Governu liu hosi Sekretaria Estadu Protesaun Sivil (SEPS) rekolla ona dadus ba vitima afeitadu hodi lori mós apoiu sasán baziku no sei oferese tan matéria kontrusaun ba vitima sira.
Vizita Xefe Governu ba suku rua ne’e akompaña hosi Ministru Interior, Fransisco Guterres, Ministru Obras Publika, Samuel Marçal, Sekretáriu Estadu Protesaun Sivil (SEPS), Domingos Mariano Reis, Deputada Parlamentu Nasionàl, Maria Barreto no Prezidente Komisaun Reguladora Arte Marisiál (KRAM), Octavio da Conceição “Anus” no veterans sira.
Enkuantu, Konfrontu fízika entre grupu juventude sira ne’ebé akontese, sesta (03/11/2023) lokoraik too kalan rezulta ema na’in-hitu (7) kanek no uma ualu (8) sunu, no balun hetan estragu (baku rahun).
Jornalista : Marcella Mery da Costa