Coach Eleven Manan Cafe Ermera, Ekipa Derrota Krítika Arbitrajen
SAPNewsTL,Dili: Ekipa Coach Eleven manan FC Cafe Ermera ho skore 2-1 iha jogu final hodi sai kampiaun ba Kopa UEP 2022 ne’ebé realiza iha kampu FFTL iha loron Kinta-Feira semana kotuk.
Hafoin jogu remata, treinador Coach Eleven Gopal Krishna hatete, jogu ohin ne’e furak ne’ebe sira hetan vitória tanba jogador sira mai ho esperensia barak ne’ebé iha jogu sira hetan oportunidade barak atu marka golu maibé la konsege.
“Jogu ne’e furak kontra jogador idade joven sira maibé vitória ami hetan ne’e husi esperensia barak mai husi jogador ekipa Coach Eleven tanba iha momentu ekipa adversariu marka golu hodi lidera jogu maibé ha’u nia jogador nafatin kalma halo nafatin jogu ne’ebé iha, jogu ohin ne’e ami hetan oportunidade barak atu halo golu maibé la konsege”. Dehan Gopal
Iha fatin hanesan treinador FC Café Ermera Adriano Casimiro Quintão kongratula ba ekipa rua ne’ebé hatudu jogu di’ak no anima adeptu sira.
“Ha’u hakarak hato’o parabéns ba ekipa rua ne’ebé mak hatudu jogu ne’ebé furak hodi anima adeptu sira iha Kampu FFTL ne’e, ita haree jogu ohin ekipa adversariu hatudu jogu di’ak tanba nakonu ho eks jogador sira ne’ebé iha esperensia barak ne’ebe hatudu duni konsege manan ha’u nia ekipa ne’ebe falla iha lina klaran no avansadu tanba la brani sobu ekipa adversariu nian ne’ebe ami sei hadia iha Futuru”. Hatete nia
Adriano hatutan sira ladun satifaz ho desizaun arbitrajen nian tanba la hatudu fair play ne’ebé jogador adversáriu halo diving iha area penalidade nia hu’u hodi fo oportunidade ba ekipa adversariu suta penalidade ne’ebé ekipa rua joga ritmu sa’e, arbitrajen foti desizaun hanesan ne’e halakon sira nia ekipa.
“Husu arbitrajen hatudu ezemplu ne’ebé mak di’ak fo profesionalizmu iha kampu tanba arbitrajen ne’e FFTL mak produs maski jogu ekipa ida lakon no manan maibé arbitrajen sira tenki hatudu desizaun justu para ekipa sira joga mos kontente ne’ebé arbitrajen la iha kapasidade tau ema seluk tanba sira dirije jogu iha liga mos hanesan mai iha torneiu sira mos nafatin foti desizaun la fo kontente ba ekipa sira”.tenik nia
Tuir observasaun jornalista SAPNewsTL iha kampu, iha jogu parte dahuluk bainhira kick off ekipa rua halo kedas jogu ho ida-idak nia estratejia rasik hodi halo presaun ba malu liu husi kontra atake ba malu ne’ebe tama ba minutu 19 jogador Emíliando Soares númeru kamizola 10 husi FC Cafe Ermera marka golu hodi fura FC Coach Eleven nia rede muda skore ba 1-0.
Rezultadu ne’e halo ekipa Coach Eleven ne’ebe nakonu ho eks jogador selesaun nasional Timor Leste hasae ritmu jogu ne’ebé tama ba minutu 28 jogador Fernando Baptista númeru kamizola 7 husi ekipa Coach Eleven marka golu hodi muda skore 1-1 ne’ebe ho skore ne’e ekipa nafatin lansa kontra atake maibe la iha ekipa ida aumenta golu entaun parte dahuluk remata ho skore 1-1.
Entretantu, ba jogu parte daruak ekipa rua muda estratejia ho ambisaun hakarak hetan vitória entaun ekipa rua hatudu ida-idak nia jogu hodi halo presaun ba malu ne’ebe tama ba minutu 74 jogador Emiliano númeru kamizola 99 marka golu liu husi suta penalidade muda 2-1 ne’ebe iha minutu ikus ekipa Café Ermera halo atake hodi marka golu maibe la konsege to’o tempu jogu parte daruak remata skore nafatin 2-1 ho rezultadu ne’e lori ekipa Coach Eleven sai kampiaun ba Kopa 2022.
Jornalista : Augusto dos Santos
Editor : Ekipa Editorial