FFTL Kongratula Asosiasaun Futebol Munisipiu Ermera
SAPNewsTL, Ermera: Prezidente Federasaun Futebol Timor Leste (FFTL) Francisco Jerónimo fo kongratulasaun ba Asosiasaun Futebol Munisipiu Ermera (AFM-E) tanba kria Kopa AFM-E 2022 ho susesu.
“Ha’u fo parabéns ba Asosiasaun Futebol Munisipiu Ermera ne’ebé realiza Kopa AFM-E 2022 ne’ebé klube Leopa FC no FC Café Ermera ohin hasoru iha jogu final, ha’u husu ba klube sira prepara an nafatin tanba jogu kada tinan kopa ne’e sei la’o nafatin no hein katak munisipiu Likisa mos halo fali para konvida sira seluk inklui munisipiu Ermera ba joga iha ne’eba tanba kopa ne’e partisipa klube sira mai husi munisipiu Ermera rasik, Likisa, Díli no Atauru”. Dehan Prezidente FFTL Francisco Jerónimo ba jornalista sira iha Estadium Kafe Gleno-Ermera Tersa-Feira,30/08/2022.
Francisco informa, responsabilidade FFTL mak halo kompetisaun futebol iha munisipal sira ne’ebé ohin loraik asiste jogu final entre Leopa FC kontra FC Cafe Ermera
“Ami resposabilidade mak ida ne’e oinsa hala’o kompetisaun futebol iha Munisipiu inklui Ermera ne’ebé ohin loraik ita mai asiste jogu final Kopa AFM-E 2022 entre Leopa FC kontra FC Cafe Ermera ne’ebé Ita haree munisipiu rua mak atu kontra malu iha ne’ebé Leopa FC husi munisipiu Likisa no FC Café Ermera “. Tenik Prezidente
Iha fatin hanesan Prezidente AFM-E Lomelino Salsinha hatete kada tinan selesaun nasional ba kompete iha jogu internasional ne’ebé agora tenke prepara jogador sira husi baze.
“Futebol la’os akontese de’it iha munisipiu sira tanba kada tinan ita nia federasaun sempre hetan konvite no apresiasaun husi FIFA, AFC no AFF atu ita nia selesaun nasional ba kompete iha eventu internasional, ita tenki prepara jogador sira husi baze hodi prepara di’ak liu tan ba eventu internasional”. Hermegildo hateten
Nia Informa, Kopa ne’e la’o durante fulan tolu ho balun hahú iha 20 fulan Maiu remata iha loron 30 fulan Agustu 2022
Iha sorin seluk Administrador Munisipiu Ermera, Eusébio Salsinha hateten ema hotu gosta futebol tanba ne’e divertidu iha era globalizasaun
“Ohin ha’u haree tribun nakonu ho adeptu sira ne’e hatudu katak ema hotu gosta futebol tanba futebol ne’e divertidu ida ne’ebé iha era globalizasaun, futebol sai ona indústria desportiva ne’ebé bele lori reseita mai estadu iha nasaun hotu-hotu iha mundu ne’ebé dedika futebol atu espresa ita nia talentu ho matenek”. Nia Subliña
Entretantu, nia hateten kompetisaun ida ne’e la’os atu haree klube ida ne’ebé di’ak liu ne’ebé Leopa FC ka FC Cafe Ermera mak manan, ema manan hotu ne’ebé hein katak klube rua hatudu jogu di’ak ho profesional para hatudu ba mundu
Reportajen: Augusto dos Santos
Editor: Ekipa Editorial