FFTL No LFTL Kontinua Duun Malu Kona-Ba Realizasaun Liga Futebol Époka 2022
SAPNewsTL, Ermera: Prezidente Federasaun Futebol Timor Leste ( FFTL) Franscisco Jerónimo hatete, Liga Timorense epoka 2022 la la’o iha fulan Agostu tinan ne’e tanba parte orgaun Liga Futebol Timor Leste (LFTL) nonok, la hatete buat ruma ba federasaun kona-ba realizasaun Liga Timorense.
“Ha’u deklara ona katak iha loron 18 fulan Agostu tinan ne’e liga tenki hahu tanba ami entre FFTL ho LFTL iha ona konkordansia para iha loron ne’e hahu liga futebol Timor Leste époka 2022 maibé depois tuir mai ami ho SEJD prepara osan parte liga nonok tiha, parese ha’u haree iha problema orsamentu tanba ne’e orgaun tenki hatete buat ruma para ita bele realiza liga ona”. Dehan Prezidente FFTL Francisco Jerónimo ba jornalista sira iha Estadium Kafe Gleno-Ermera Tersa-Feira,30/08/2022.
Jerónimo informa, sira prontu hela maibé sira respeita orgaun LFTL hodi organiza liga futebol ne’ebé sira sei hein nafatin orgaun LFTL tanba sira mak implementador ba Liga Futebol Timor Leste.
“Federasaun prontu hela maibé respeita orgaun LFTL ne’ebé organiza futebol ne’ebé ami manda karta ba sira atu tur hamutuk maibé parte LFTL la iha resposta ne’ebé federasaun nakloke atu organiza LFTL ho FFTL tenki iha onestu ba malu tanba ne’e importante labele taka hodi falun ba buat ne’ebé presiza hatete sai, ami sei hein orgaun LFTL tanba nu’udár orgaun ne’ebé implementa liga futebol iha Timor Leste”. Tenik Prezidente
Prezidente ne’e aumenta, Liga futebol Timor-Leste epoka 2022 ne’e sira halo ona konferensia imprensa hodi husu ba parte orgaun LFTL fo sira nia hanoin tanba orsamentu ba liga epoka ne’e FFTL ho SEJD preparadu tiha ona oinsa ho orgaun LFTL ne’ebé organiza futebol tenki hatete buat ruma karik orgaun LFTL la hahu sira sei tempu badak hasoru ho klube sira atu ko’alia lala’ok liga futebol epoka ne’e.
Iha sorin seluk Diretor Finansa LFTL Caetano Cárceres Correia hatete, sira nafatin nakloke ba federasaun prontu tur hamutuk
“Ami nafatin nakloke ba FFTL prontu atu tur hamutuk, ida ne’e mak ami nia hakarak Liga Futebol Timor Leste epoka 2022, ami ho FFTL tenki tur hodi ko’alia no serteza hamutuk hafoin ami hala’o liga tinan ne’e tanba ne’e mak ami nia hakarak hahu husi Janeiru to’o agora”. Caetano informa
Diretor ne’e akresenta sira seida’uk responde karta husi FFTL ne’ebé manda iha loron 12 fulan Agostu razaun tanba bazeia ba karta iha loron 20 fulan Jullu husi SEJD husu Prezidente FFTL no LFTL tur hamutuk diskute liga futebol epoka 2022 maibé seida’uk iha serteza no sira kria tiha ona komunikasaun ho FFTL atu bele tur hamutuk hodi bele organiza enkontru triparte entre orgaun LFTL, FFTL no klube sira maibé la serteza, foin mak karta ne’e sai bainhira prezidente FFTL fo anunsiu ona kalendariu jogu iha públiku.
Caetano fundamenta, antes ne’e LFTL manda karta atu parte LFTL tur hamutuk ho federasaun maibe hetan kanselamentu husi FFTL nafatin.
“Antes ne’e iha loron 23 fulan Fevereiru 2022 ami aprezenta ona kalendariu jogu ba FFTL ho planu tentativa realizasaun liga epoka 2022 maibé parte FFTL la aseita hodi publika iha media de’it la resposta karta ofisial ne’e mai ami, kontinua mai iha loron 26 fulan Abril 2022 parte LFTL hato’o karta pedidu ba FFTL atu orgaun superior parte rua ne’e hasoru malu maibé ami nafatin hetan kanselamentu ba enkontru ne’e, iha loron 30 fulan Maiu 2022 LFTL submete tan karta ba FFTL hodi husu atu ami halo enkontru temporariu ida ne’ebé sei realiza entre FFTL, Orgaun LFTL ho klube sira maibé ida ne’e mos la realiza to’o agora”. Diretor salienta.
Reportajen: Augusto dos Santos
Editor: Ekipa Editorial