CONTL Realiza Hanghou Asian Games 2022 Peace Run
SAPNewsTL, Dili: Comite Nasional Olimpiku Timor-Leste (CONTL) sei realiza Peace Run hodi promove Asian Games 2022 mak sei realiza iha fulan setembru 2023 iha sidade Hanghou, Xina.
“Ami hakarak informa ba públiku katak aban ita sei realiza peace run ba Asian Games 2022 hala’o iha sidade Hanghou, Xina nune’e ami hakarak informa ba públiku sira karik iha tempu bele partisipa atividade ne’e hodi promove Asian Games 2022 sei realiza iha fulan setembru 2023”, dehan Vise Prezidente CONTL Mateus da Cruz ba jornalista liu husi konferensi imprensa iha nia knaar fatin Colmera, Dili sexta (30/06/2023).
Mateus hatutan, Atividade ida ne’e sei komesa iha oras tuku hitu dader, sei hetan apoiu masimu husi polisia komandu munisipiu Dili, sira sei asegura dalan ba peace run nian ho 5 km husi jinajiu desportu Dili, Aitarak Laran, Farol, Palasiu Governu fila fali mai jinajiu desportu Dili
Nia informa tan, atividade ba aban nian sira konvida ona Prezidente República, Embaixador sira iha Timor-Leste hamutuk ho komisaun organizador mai tiha ona husi nasaun Xina no atividade ne’e hetan suporta masimu husi komandu munisipiu Dili no sponsor importante husi Grand Dragon Lotaria.
Iha fatin hanesan, Komandante Tranzitu Munisipiu Dili Ângelo Quelo hatete, sira prontu asegura atividade ne’e tuir ordem husi komandu munisipiu Dili
“Ami prontu asegura atividade aban dadersan ne’e kumpri ordem husi polisia komandu munisipiu Dili nian”, tenik Ângelo
Iha sorin seluk CEO Grand Dragon Lotaria Datok Harry dehan, sira nu’udar sponsor sira apoiu moral no finanseiru ba atividade loron aban nian.
“Ami nu’udar sponsor ba eventu ne’e ami sei apoiu moral no finanseiru ba atividade aban nian tanba ami promete katak ami sei apoiu eventu saida deit iha Timor-Leste ba Dezenvolvimentu nasional nune’e nafatin enkoraja ba foinsa’e sira tanba nu’udar pilar importante ba nasaun nian”, Datok hateten.
Reportajen: Augusto dos Santos