CONTL Realiza Semináriu, Dony Aprezenta Sistema Desportu Indonesia Ba TL
Imajen Orador husi Universitas Negeri Surabaya Dony A. Kusuma, iha Pusat Budaya Indonesia Marscarenhas, Dili, Kinta-Feira, 29/09/2022
SAPNewsTL, Dili: Komite Nasional Olímpiku Timor Leste (CONTL) hamutuk ho Universitas Negeri Surabaya Realiza Semináriu ho tema Siensia no Manajementu Desportu ba treinador sira iha Timor Leste, objetivu husi seminariu ne’e hodi prepara no desenvolve atleta di’ak liu tan ba futuru.
Tuir Vise Prezidente CONTL Mateus da Cruz katak konvida Universitas Negeri Surabaya mai fahe nia esperiensia ba treinador Timor oan sira atu sira bele hatene didiak kona-ba kompetensia atleta, oinsa sai di’ak liu tan iha futuru.
Imajem Intervista Vise Prezidente CONTL Mateus da Cruz
“Ohin ami hamutuk ho Universitas Negeri Surabaya halo semináriu ba treinador desportu iha Timor Leste ho tema siensia no manajementu desportu tanba evolusaun desportu sempre la’o ba oin maibé, ita nia federasaun desportivu sira ladun iha kuñesimentu di’ak maski sira iha esperensia barak, tan ne’e ita haruka mai para fahe esperensia atu nune’e ita nia treinador sira bele hatene atleta sira di’ak liu kona-ba atleta gasta enerjia no atu rekupera fali oinsa”. Dehan Vise Prezidente CONTL Mateus Da Cruz ba jornalista sira iha Pusat Budaya Indonesia Marscarenhas, Dili, Kinta-Feira, 29/09/2022.
Iha fatin hanesan, orador husi Universitas Negeri Surabaya Dony A. Kusuma hatete, situasaun Timor Leste ho Indonesia hanesan de’it maibé problema iha Timor Leste mak sistema dezentendimentu desportu ne’ebé sira mai para fo hatene saida mak Indonesia halo durante ne’e hodi dezenvolve área desportu.
“Situsaun ba dezenvolvimentu desportu Timor Leste ho Indonesia ne’e hanesan de’it ne’ebé kona-ba budget, infrastrutura, kultural no sira seluk maibé issue ne’ebé ha’u rona kona-ba problema iha Timor Leste mak sistema dezentendimentu desportu nian ne’ebé ohin ha’u fo saida mak durante ne’e ami nia nasaun halo durante ne’e kona-ba oinsa buka atleta talentu sira hamutuk ho federasaun sira, CONTL no Ministeriu edukasaun liu husi eskola sira”. Dony informa
Orador Universitas Negeri Surabaya Dony A. Kusuma
Dony hatutan, sira mos fo oinsa halo training monitoring ba atleta husi loron ba loron liu husi aplikasaun website online ba treinador sira iha Timor Leste atu haree performa atleta sira iha teritoriu nasional.
Entretantu, nia hein katak partisipante sira bele simu saida mak fo atu nune’e pratika iha Timor Leste hodi nune’e Timor Leste mos bele konta iha kontinente Azia liu husi desportu.
Jornalista: Augusto dos Santos
Editor: Luis dos Santos