CPLP & MJDAC Rekolla Dadus Fasilidade Jogu CPLP 2025 Iha TL
Imajem : Entrevista Diretor Nasional desportu MJDAC João Rodrigues iha edifisiu MJDAC sesta (19/04/2024).
SAPNewsTL, Dili: Ekipa tékniku husi organizasaun Comunidade Paises das Lingua Portuguesa (CPLP) hamutuk ho Ministériu Juventude Desportu Arte Kultura (sigla portuges MJDAC) rekolla dadus ba fasilidade jogu CPLP 2025 tanba Timor-Leste mak sei sai uma nain iha fulan jullu 2025.
“Agora ita hamutuk ho ekipa tekniku husi CPLP hahu ona faze rekolamentu dadus ba fasilidade kampu sira durante loron haat bainhira remata ona, ita sei aprezenta rezultadu ba ministru juventude desportu arte kultura no parte kompetente para rezolve fasilidade menus sira ne’e maski infrastrutura iha ona maibe presiza hadia diak liu tan”, dehan Diretor Nasional desportu MJDAC João Rodrigues ba jornalista sira iha edifisiu MJDAC sesta (19/04/2024).
João hatutan, ekipa tékniku husi CPLP mai ne’e nain rua koordenador desportu CPLP ho prezidensia ba konferensia ministru juventude desportu CPLP, sira mai hare’e fasilidade sira, sira observa ona estadium sira iha Gleno ho Dili, jinajiu, kampu tenis no voleibol praia maka sai hanesan rekezitu ba Timor-Leste sai uma nain jogu CPLP 2025.
Ekipa mos hare’e ona CCD Merkadu Lama sai nu’udar fatin ba kultural nian iha tempu kalan, ekipa hare’e organizasaun despotivu sira iha Timor-Leste hola parte iha jogu CPLP 2025, sira mos hare’e fatin turistiku Cristu Rei, Estatua João Paulo II ho Muzeum Rezistensia, ekipa hasoru ministru interior hodi koalia seguransa ba jogu CPLP ne’e rasik nune’e ministru interior aprezenta katak parte serguransa preparadu.
Diretor infoma tan, Timor-Leste sei sai uma nain ba jogu CPLP 2025, iha rua jogu desportivu CPLP U-16 ho jogu paralimpiku U-20 no organiza konferensia munisipal juventude desportu CPLP, nu’udar uma nain ba jogu CPLP nune’e ba infrastrutura ba jogu nian, kampu sira tenki tama rekezitu, tan ne’e governu sei hadia fasilidade estadium ho kampu sira.
Iha fatin hanesan, koordenador desportu konferensia ministru juventude desportu CPLP Jorge Carvalho hatete, sira halo ona observasaun ba kampu sira no fasilidade sira seluk katak Timor-Leste iha sufisiente ona maibe presiza hadia diak liu tan.
“Ami halo ona observasaun ba kampu sira no fasilidade sira seluk tan, katak Timor-Leste iha kondisaun sufisiente maibe presiza hadia diak liu tan, nune’e CPLP mos iha ekipa tekniku ida akompaña nune’e jogu bele la’o diak”, tenik Jorge
Jorge afirma tan, jogu CPLP ida ne’e laos ba desportu deit maibe parte turizmu, otel, hahan no transporte hola parte hotu. ida ne’e oportunidade ba governu Timor-Leste investe ba infrastrutura, hadia kampu ba jogu sira maibe sira fiar katak bainhira jogu CPLP komesa infraestrutura ho fasilidade prepara hotu ona.
Entretantu, jogu CPLP U-16 ho jogu paralimpiku U-20 iha Timor-Leste, modalidade sira atu kompetisaun mak taekwondo, atletizmu, voleibol praia, futebol, karate, xadres, tenis kampu, basketbol 3×3 no jogu paralimpiku para atletizmu.
Jogu CPLP 2025 iha Timor-Leste sei komesa iha loron 11 to’o 27 fulan jullu 2025, nune’e Timor-Leste mak sei responsabiliza ba akomodasaun, hahan no transporte sira.
Reportajen: Augusto dos Santos
