Hasai Povu La Ho Dignu ! PDHJ Konsidera Ne’e Falta Respeitu

Imajem : PDHJ Virgílio da Silva Guterres “Lamukan” hala’o komunikadu imprensa iha Sala Biblioteca PDHJ, Caicoli, Dili,19/04/2024. SAPNewsTL asesu liu husi Pajina Facebook PDHJ. Foto : Média PDHJ

SAPNewsTL, Dili: Provedor de Direitos Humanos e Justiça (PDHJ), Virgílio da Silva Guterres “Lamukan” hamutuk ho estrutura lamenta ho eviksaun ne’ebe Governu liu husi Sekretaria Estadu Asuntu Toponomia Organizasaun Urbanu (SEATOU) halo hasoru komunidade aitarak-laran.

PDHJ Virgílio da Silva lamenta ho aprosimasaun ne’ebé governu halo liuhusi Sekretáriu Estadu Toponomia nian hasoru komunidade tanba ses husi prinsipiu direitu umanus.

“Provedór lamenta ho aprosimasaun ne’ebé governu halo liuhusi Sekretáriu Estadu Toponomia nian hasoru komunidade tanba ses husi prinsipiu direitu umanus nini’an”. Tenik PDHJ Virgilio Guterres Lamukan liu husi komunikadu imprensa iha Sala Biblioteca PDHJ, Caicoli, Dili,19/04/2024. SAPNewsTL asesu liu husi Pajina Facebook PDHJ

Virgilio Lamukan haktuir PDHJ hanesan entidade estadu ninian apoia kualker inisiativa estadu nian maibe ho observasaun provedór haree hanesan iha sengol, no ikus liu iha aitarak-laran, iha nessesidade provedór atu fó sai ba públiku buat balun sai preokupasaun tebes.

“Pimeiru kualkér prosesu despezu tenke halo ho prinsipiu respeitu ba direitu humanus, oinsa trata ema ho dignidade no dignu.”

Repúblika Demokrátiku Timor-Leste (RDTL) estado de direitu demokrátiku ida ne’e implika katak, kualkér aprosimasaun polítika ne’ebé governante sira halo hasoru povu tenke respeita prinsipiu direitu umanus.

“Aprosimasaun membru governu sira, aparellu estadu ni’an ba ita nia povu tenke afirma prinsipu ida ne’e labele halo ema rai seluk haree ita sai munafik (finjidu), proklama’an estado de direitu demokrátiku maibe ita uza aprosimasaun autoritariu, la respeita ita nia povu,”hateten PDHJ Virgilio

Lamukan hatutan, Provedór la kestiona kona-ba komunidade sira los ka sala, ne’e kestaun seluk, provedór nia intervensaun atu hatete povu sira iha sengol, aitarak-laran merese hetan tratamentu ne’ebé dignu husi kualkér governante.

“Iha eleisaun ita lori fos, supermie, lori osan ba hamaus povu atu hili ita, depois ita ukun ita la respeita fali sira, ne’e falta de respeitu, ita la kestiona povu ne’e viola regra ne’e laiha, kriminozu sira kuandu ita kaer hatama kadeia ita sei fo han no respeita sira sa tan populasaun”.

Provedór Direitu Humanus haree entidade sira ne’ebé estadu harii atu proteze direitu humanus, apela ba governante husi ministeiru relevante atu tau atensaun ida ne’e, respeita povu nia dignidade humana, trata sira hanesan ema, ba ko’alia ho sira didi’ak hanesan uluk politíka sira ba ko’alia no hamaus iha elisaun, la’os ukun tiha ba trata sira hanesan ema laiha dignidade.

Antes ne’e iha loron 17 fulan Abril, ekipa konjunta ne’ebe lideradu husi SEATOU halo eviksaun ba uma komunidade iha area aitarak-laran Aldeia Anin Fuik suku Kampung Alor, Postu Administrativu Dom Aleixo tanba fatin refere konsidera espasu públiku.

Ekipa SEATOU sobu ona uma komunidade iha area Bidau tanba komunidade sira okupa fatin públiku hodi faan sira nia produtu lokal inklui produtu sira seluk ne’ebe povu kiik sira faan hodi hadia sira nia ekonomia familiar.

SEATOU mos sobu ona baraka 93 iha merkadu komoru antigu ne’ebe pertense ba postu administrativu Dom Aleixo, Munisipiu Dili.

PDHJ husu ba autoridade sira, xefe suku parte Aitarak-Laran iha ne’e, Prezidente autoridade municipiu Dili, Ministeiru relavante, Administradór Postu atu iha tempu badak hamutuk ko’alia garante apoiamentu ne’ebé dignu ba komunidade sira iha Aitarak-Laran familia ruanlu resin ida (21), tanba agora sira laiha fatin atu hela.

Jornalista : Conzita Mota