Cristovão Konsidera Dosente Viola Regra Akadémika ! Ameasa Tama Gabinete
Imajem : Senadu Geral UNTL Cristovão de Araujo iha Kampus Sentral UNTL, 02/04/2024. Foto : Dircia Belo
SAPNewsTL, Dili : Relasiona ho dosente Fakuldade Direitu UNTL ne’ebe kontra regulamentu akadémiku, Assosiasaun Estudantil Fakuldade Direitu liu husi komunikadu imprensa informa, Estudante barak sai vítima tanba falla husi kontrolu estrutura Fakuldade Direitu UNTL ne’ebe lidera husi professor Júlio Crispim.
Lider estudante UNTL, Cristovão de Araujo konsidera Professor Júlio Crispim sempre abandona aula inklui la respeita orariu ne’ebé fixa ona husi Fakuldade.
“Dosente Fo Exame Tarde; aktu ida ne’e sempre akontese iha Fakuldade Direitu no sempre Prátika husi Professor Júlio Crispim, Professor João Sarmento nu’udar asistente Professor Júlio Crispim nian hodi hanorin kadeira Lójika no Introdusaun Filosofia, inklui Professor José Tomas Alves.”
“Tinan tinan dosente sira ne’ebe naran temi ona ne’e la realiza avaliasaun ka exame tuir tempo ne’ebe determina ona iha kalendario akadémiku, aktu ne’e hatudu puramente dosente sira ne’e la kumpri no la respeita kalendariu akadémika universidade nian ne’ebe mak fo sai husi parte Akadémica UNTL nian.” Tenik Senadu Geral UNTL Cristovão de Araujo iha Kampus Sentral UNTL, 02/04/2024
Senadu Geral mos lamenta ho Professor Julio Crispin ne’ebe autoriza graduadu iha tinan 2023 ho grau lisenciatura hodi hanorin estudante Direitu sira hanesan iha materia TGDC no Direitu Família maske sira nia estatutu hanesan Assistente Dosente. Maske sira nia estatuto hanesan Assistente dosente maibe sira fo aula hanesan los Professor Titular de kadeira no la hetan akompanhamentu máximu husi professor da kadeira. Lolos, assitente refere seidauk bele hanorin maibe monotoriu uluk aula tamba sira seidauk iha experencia hanorin.
Aleinde ida ne’e, estudante sira kestiona no lamenta teb-tebes ho Professor Nídio Pinto nia aktu ida ne’ebé mak sempre abandona aula Direitu Fiskal ne’ebe sein informasaun ba estudante sira no la respeita orariu sira. Professor João Sarmento ne’ebe nu’udar Assistente Professor Julio Crispin nian iha kadeira Introdusaun Filosofia no Lójika tama aula la tuir orariu ne’ebe fixa ona iha kuadru avizu.
Associação Acadêmica Estudantil Faculdade Direito, liu husi komunikadu, husu ba estrutura fakuldade hodi fo seriedade ba preokupasaun hirak ne’ebe estudante sira hasoru durante ne’e.
“Ami ejiji ba Estrutura Fakuldade hanesan Dekanu Interino no Vise-Dekano Asunto Akadémiku, Professor Júlio Crispim atu hamutuk ho Vice Dekanu Administrasaun-Finansa, Mestre Estevão Sanches no Vice Dekana Estudantil, Dra. Prycillia Ximenes hodi rezolve preokupasaun estudante sira nian ne’ebé sita ona iha leten”. Cristovão de Araujo husu
“Ami husu ba Dekanu interino no Vice-Decano Assunto Acadêmiku ne’ebé nu’udar Presidente Conselho Pedagójico e científico Fakuldade nian, Professor Julio Crispin atu kumpri uluk regra no halo xamada ba dosente sira ne’ebé mak abandona aula, la kumpri orariu aula nian, fo ezame atrazu atu kumpri deit orariu, kalendariu akadémiku, kumpri regulamentu Akadémiku no mos husu ba dosente sira ne’ebé seidauk publika notas tenki publika ona notas iha semana ida ne’e nia laran.”
Entretantu, wainhira estrutura la foti medidas hodi rezolve problema estudante nian, maka Associação sei mobiliza estudante Direitu sira hotu hodi halo asaun hasoru estrutura Fakuldade inklui Universidade, blokeia prosesu ensinu aprendijajem no tama gabinete reitor no dekanu.
“Wainhira laiha solusaun iha semana ne’e, ami sei blokeia prosesu ensinu, halo asaun hasoru fakuldade no universidade, inklui tama gabinete reitor UNTL no gabinete dekanu hodi ezije direitu estudante sira nian”.
Hafoin komunikadu imprensa, SAP News tenta atu halo komfirmasaun ho estrutura Fakuldade maibe estrutura dekanu laiha fatin servisu.
Jornalista : Dircia Baptista