Estudante Sei Keixa Dosente Ba Komisaun Funsaun Públika
Imajem : Senadu Fakuldade Direitu UNTL Cristovão de Araujo iha Kampus Sentral UNTL, 02/04/2024.
SAPNewsTL, Dili : Assosiasaun Estudantil Fakuldade Direitu afirma sei blokeia prosesu aprendijajem no hato’o keixa ba Komisaun Funsaun Públika (KFP) hodi prosesa tuir lei, wainhira dosente fakuldade direitu la rezolve problema estudante iha tempu badak.
Associação Acadêmica Estudantil da Faculdade de Direito da UNTL ( AAEFD-UNTL ) hanesan organizmu ida husi Fakuldade Direitu ne’ebé konstitui nu’udar organizasaun estudantil ho misaun prinsipal mak atu defende direitu no interese estudante nian no mos reprezenta estudante sira hodi koordena ho estrutura Fakuldade hodi buka solusaun ba problema sira ne’ebé estudante sira hasoru.
Bazeia ba misaun suprasitada, maka Associação Acadêmica Estudantil da Faculdade de Direito liu husi orgaun de governasaun Associação nian halo reuniaun geral ho estudante sira no identifika problema lubuk sira ne’ebe estudante direitu sira enfrenta durante sira nia estudu iha fakuldade.
“Dosente Sira Publika Nota Atraza, Problema ida ne’e estudante sira sempre enfrenta iha Fakuldade Direitu bainhira realiza tiha ona ezame final. Dosente ne’ebé sempre komete aktu ida ne’e mak Professor Júlio Crispin ne’ebé nu’udar Professor titular ba Kadeira Lójika, Teoria Geral de Direito Civíl ( TGDC ), Direitu Real no mos Filosofia de Direitu no Assistente Professor Júlio Crispin nian, Professor João Sarmento. Iha Faktu hatudu katak estudante 2°anu iha tinan 2021 halo ezame TGDC I iha tinan 2021 maibé nota publika iha tinan 2022, enkuantu estudante 1°anu sira iha tinan 2022 halo ezame kadeira Lójika iha tinan 2021 maibé notas publika iha tinan 2023”. Tenik Senadu Fakuldade Direitu UNTL Cristovão de Araujo ba jornalista sira iha Kampus Sentral UNTL, 02/04/2024
“Dosente Lakohi Publika Nota, situasaun ida ne’e sai preokupasaun bo’ot ba estudante Fakuldade direitu nian, liuliu iha kadeira Direitu Prosesual Penal no Direitu Komersial. Kazu refere, akontese ba estudante Finalista tinan 2024 ne’ebé realiza teste iha tinan 2022 maibé nota seidauk publika to’o agora.”
“Aleinde ida ne’e, notas ba kadeira Direitu Prosesual Penal no Direitu Komersial I no II ne’ebé mak hanorin husi Professor José Tomas Alves to’o agora seidauk publika maski estudante Finalista tinan 2024 realiza ona ezame iha tinan 2022. Bainhira estudante sira konfirma ho Professor José Tomas Alves no Professor hateten katak, bainhira atu halo defeza monografia foin bele fo sai notas. Situasaun ida ne’e, akontese mos ba 4º ano tinan 2023 ne’ebe mak realiza tiha ona exame ba kadeira Direitu Processual Penal iha Fulan Dezembro de 2023 maibe to’o agora 2024 nota seidauk publika.”
Presidente Assosiasaun Estudantil ne’e hatutan, dala barak dosente sira la kumpri horáriu no abandona aula inklui tama aula tuir sira nia hakarak. Situsaun ne’e halo estudante fakuldade direitu preokupa tanba dosente sira viola regra akadémiku.
“Dosente La Kumpri Orariu no Abandona Aula; Violasaun ba orariu no abandona aula ne’e sai preokupasaun boot ba estudante Fakuldade Direitu nian, tanba tinan-tinan Fakuldade publika tiha orariu iha kuadru avizu iha ne’ebé asina ona husi Decanu Fakuldade, maibé dosente balu kontinua viola no la respeita, inklui tama aula tuir sira nia hakarak. Situasaun ida ne’e estudante sira sempre hasoru no Prátika husi, Professor Júlio Crispin no Professor José Tomas Alves, Professor Nídio Pinto nudar dosente Kadeira Direitu Fiskal no mos Professor João Sarmento nudar Assistente Professor Julio Crispin nian.”
Lider estudante UNTL ne’e konsidera Professor Júlio Crispim sempre abandona aula inklui la respeita orariu ne’ebé fixa ona husi Fakuldade. Aleinde ida ne’e, estudante sira kestiona no lamenta tebtebes ho Professor Nídio Pinto nia aktu ida ne’ebé mak sempre abandona aula Direitu Fiskal ne’ebe sein informasaun ba estudante sira no la respeita orariu sira. Enkuantu Professor João Sarmento ne’ebe nudar Assistente Professor Julio Crispin nian iha kadeira Introdusaun Filosofia no Lójika tama aula la tuir orariu ne’ebe fixa ona iha kuadru avizu.
“Dosente Fo Exame Tarde; aktu ida ne’e sempre akontese iha Fakuldade Direitu no sempre Prátika husi Professor Júlio Crispin, Professor João Sarmento nu’udar asistente Professor Júlio Crispim nian hodi hanorin kadeira Lójika no Introdusaun Filosofia, inklui Professor José Tomas Alves. Tinan tinan dosente sira ne’ebe naran temi ona ne’e la realiza avaliasaun ka exame tuir tempo ne’ebe determina ona iha kalendario akadémiku, aktu ne’e hatudu puramente dosente sira ne’e la kumpri no la respeita kalendariu akadémika universidade nian nebe’é mak fo sai husi parte Akadémica UNTL nian.” Cristovão de Araujo lamenta
Estudante Lamenta ho Professor Julio Crispin ne’ebe autoriza graduadu iha tinan kotuk ka 2023 ho grau lisenciatura hodi hanorin estudante Direitu sira hanesan iha materia TGDC no Direitu Família maske sira nia estatuto hanesan Assistente Dosente. Maske sira nia estatuto hanesan Assistente dosente maibe sira fo aula hanesan los Professor Titular de kadeira no la hetan akompanhamentu máximu husi professor da kadeira. Lolos, assitente refere seidauk bele hanorin maibe monotoriu uluk aula tamba sira seidauk iha experencia hanorin.
Atendimentu Administrasaun Fakuldade Direitu nian ladun diak; Estudante Direito preokupa ho atendimentu funsionáriu Administrasaun Fakuldade nian tanba dalaruma tama servisu tarde, atende estudante ho kasar (agresivu) no trata transkrisaun nota ba estudante sira tarde no mos ladun arkiva didiak estudante sira nia notas.
Cristovão realsa, violasaun sira ne’e mosu tamba estrutura Fakuldade hanesan Dekanu no Vice Dekanus liuliu Vice Dekanu Assuntu Akadémiku, Professor Julio Crispin falta de kontrolu iha Fakuldade hodi haree kona ba dosente sira nia prestasaun iha prosesu ensino aprendizagem no avaliasaun sira inklui kumprimentu ba orariu, kalendariu akadémiku no regulamentu akadémiku.
Associação Acadêmica Estudantil konsidera dosente sira ne’ebé identifikadu iha leten la kumpri sira nia dever ne’ebé previstu iha númeru 3 no 4 iha artigu 10°Código Conduta da UNTL ne’ebé aprova iha Conselho Geral UNTL iha tinan 2014.
Associação Acadêmica Estudantil konsidera dosente sira ne’ebé naran supresitada la hatudu exemplu di’ak ba estudante Direitu sira, la hatudu responsabilidade loloos nu’udar dosente de Direitu, la respeita ka halo abuzu ba direitu estudante sira nian, aktu hirak ne’e prejudika tebes estudante sira nia estudu iha Fakuldade Direitu liuliu pasajem ba klase, tanba estudante sira la hatene sira nia rezultadu/notas loloos husi avaliasaun ne’ebé sira halo.
“Difikulta estudante sira atu foti fali kadeira sira ne’ebé sira reprova tanba nota públika tarde liu no mos halo estudante sira dilemátika ho kadeira ne’ebé sira realiza ona teste ka ezame tanba estudante sira laiha serteza katak sira aprovadu ou reprovadu. Prejudika mos estudante Finalista tanba sira kontinua selu propinas $30.00 maski sira la utiliza másima ona fasilidade universidade ka fakuldade nian, maibé tanba de’it nota sei dauk tama kompletu hodi bele hetan karta livre teoria hodi selu ho montante $5.00 ba iha UNTL. Aktu ida ne’e hatudu katak Universidade ka fakuldade liu husi dosente halo explorasaun ba estudante sira.”
Associação Acadêmica Estudantil Faculdade Direito, liu husi komunikadu, husu ba estrutura fakuldade hodi fo seriedade ba preokupasaun hirak ne’ebe estudante sira hasoru durante ne’e.
“Ami ejiji ba Estrutra Fakuldade hanesan Dekanu Interino no Vise-Dekano Asunto Akadémiku, Professor Júlio Crispin atu hamutuk ho Vice Dekanu Administrasaun-Finansa, Mestre Estevão Sanches no Vice Dekana Estudantil, Dra. Prycillia Ximenes hodi rezolve preokupasaun estudante sira nian ne’ebé sita ona iha leten”.
“Ami husu ba Dekanu interino no Vice-Decano Assunto Acadêmiku ne’ebé nu’udar Presidente Conselho Pedagójico e científico Fakuldade nian, Professor Julio Crispin atu kumpri uluk regra no halo xamada ba dosente sira ne’ebé mak abandona aula, la kumpri orariu aula nian, fo ezame atrazu atu kumpri deit orariu, kalendariu akadémiku, kumpri regulamentu Akadémiku no mos husu ba dosente sira ne’ebé seidauk publika notas tenki publika ona notas iha semana ida nee nia laran.”
Atual Senadu Jeral UNTL ne’e mos husu ba magnífiku reitor UNTL hodi halo intervensaun ba problema sira ne’ebe estudante sira hasoru iha fakuldade direitu iha tempu badak.
“Ami mos exige ba Estrutura UNTL, Magnífiku Reitor ho estrutura atu intervem ona iha problema estudante sira nian hodi bele rezolve lalais tamba estrutura Fakuldade, atualmente lidera husi Decano interino, Professor Julio Crispin laiha vontade diak no seriedade hodi rezolve problema estudante nian. Alem de ida ne’e, Ami mos husu ba membru Conselho Geral UNTL atu preokupa mos ba problema estudante Direitu nian hodi chamada estrutura UNTL no Fakuldade hodi soluciona problema refere”.
Estudante Fakuldade direitu mos husu ba Ministro Ensino Superior no Komisaun Parlamentar ne’ebe tratra assuntu Edukasaun atu tau matan ba problema estudante Direitu UNTL nian tamba daudaun ne’e estudante sai hela vítima ba dosente sira nia aktu.
Entretantu, wainhira estrutura la foti medidas hodi rezolve problema estudante nian, maka Associação sei mobiliza estudante Direitu sira hotu hodi halo asaun hasoru estrutura Fakuldade inklui Universidade, blokeia prosesu ensinu aprendijajem tama gabinete reitor no dekanu.
“Wainhira laiha solusaun iha semana ne’e, ami sei blokeia prosesu ensinu, halo asaun hasoru fakuldade no universidade, tama gabinete reitor UNTL no gabinete dekanu hodi ezije direitu estudante sira nian, inklui hato’o keixa ba komisaun funsaun públika hodi prosesa sira tuir lei”.
Hafoin komunikadu imprensa, SAP News tenta atu halo komfirmasaun ho estrutura Fakuldade maibe estrutura dekanu la konsege tanba okupadu ho servisu seluk.
Jornalista : Marciana da Conceição
