Dalan Ba Marka Diferença, MJDAK Sei Desenvolve Infraestrutura Desportiva
SAPNewsTL, Dili: Ministru Juventude Desportu no Arte Kultura (MJDAK) Nelio Izac prontu dezenvolve area desportu iha Timor-Leste tanba IX governu konstitusional mai ho planu estratejiku ba hari’i infraestrutura, atividade no formasaun ba rekursu umanu.
“Hau sei halo konsolidasaun internal ba diresaun juventude, desportu no arte kultura mak funsiona hela tanba governu agora mai ho planu estratejiku hodi hahu defini legalmente kona ba funsionamentu instituisaun depois hala’o programa tuir aprovasaun iha parlamentu nasional, Ita iha problema ba atividade desportu mak partisipasaun atleta sira nian”.
“Nune’e governu IX iha komitmentu fo prioridade ba area infraestrutura laos ba futebol deit maibe ba modalidade sira hotu,agora Ha’u foin tama Ha’u sei identifika problema sira antes tinan ne’e remata, iha ona mudansa ba tekniku profesional sira servisu ba area desportu nian depois halo planu ba infraestrutura, atividade formasaun ba rekursu umanu”, dehan Ministru Juventude Desportu no Arte Kultura Nelio Izaac Sarmento ba jornalista hafoin halo despedida ho eis SEJD iha eis edifisiu SEJD Lecidere, Dili segunda (03/07/2023).
Nelio hatutan, Uluk nia iha SEJD maizumenus tinan rua deit agora nia fila fali mai laos sekretariu estadu maibe nu’udar ministru nia responsabilidade boot liu tanba husi SEJD ba ministeriu no sei hare’e mos kona ba arte kultura nian maibe kualker setor saida deit importante mak dezenvolvimentu ba populasaun Timor-Leste tanba idade joven 80% nune’e responsabilidade boot tebes ida oinsa hamosu identidade ba Timoroan hotu hodi marka diferensa entre Timor-Leste ho nasaun seluk.
Nia informa, IX governu konstitusional nia planu loron 120 nian deit maibe mos presiza solusiona ho profesional planu balun urjentemente mak hanesan problema internal kona juventude, desportu no arte kultura anterior sira ne’e atu nune’e para maksimiza funsionamentu ministeriu nian maibe ba desportu espesifiku oituan presiza aselera hodi solusiona.
Ministru ne’e afirma tan, iha area desportu liuliu liga futebol sei halo diskusaun ho FFTL no orgaun liga rasik atu define programa liga tuir mai laos ba futebol deit maibe iha mos ba modalidade sira seluk hanesan voleibol, basketebol no arte marsiais sira.
“Sira sei iha atividade regular atu nune’e atleta sira treinu loron- loron depois liu selesaun reprezentante Timor-Leste ba kompetisaun internasional sira, iha semana rua ka tolu ba kotuk iha reprezentante FIFA mai sira hasoru malu halo diskusaun lubuk ida”.
“Nune’e governu hamutuk ho FFTL no FIFA iha konkordansia ida atu halo invesrtimentu adekuadu moderniza Stadium Munisipal Dili serve atu halo jogu internasional iha Timor-Leste tanba Ha’u iha mehi tinan oin komesa hari’i stadium standarte internasional nian”.
Reportajen: Augusto dos Santos