Udan Boot Rezulta Estrada Ligasaun Covalima-Bobonaro Kotu
SAPNewsTL, Covalima: Relasiona ho udan boot ne’ebe akontese iha Munisipiu Covalima no Bobonaro Rezulta Estrada Foun Diresaun Postu Administrativu Munisipiu Covalima ba Munisípiu Bobonaro Kotu Difikulta Movimentasaun Transporte Sira
“Ami ladun hatene Estrada ne’e kotu iha oras saida tanba iha ne’e udan desde Orseik kedas la para to’o agora, ohin tuku tolu loraik ne’e ami halo viajen ba Zumalai mak hare no ami mos sente hakfodak tanba Estrada ne’ebe utiliza seidauk to’o tinan rua”. Dehan Manuela Mora liu husi via WhatsApp ba SAPNews Segunda (03/07/23).
Tuir nia” Estrada ne’e kotu total hela deit oituan nune’e transporte sira hanesan motorizada bele liu maibe kareta sira mak labele liu tanba rai monu inklui barreira no valeta iha Estrada ninin, nune’e difisil tebes atu karreta sira ultrapasa”.
Manuela hatutan, “Ho volume udan ne’ebé ate agora seidauk para posibilidade Estrada ne’e bele kotu total inklui infraestrutura bázika sira seluk ne’ebé ita la espera bele estraga husi natureza hodi hamosu erosaun”. Nia hatete
Sidadaun ne’e mos husu atu kompaña responsável no Ministériu Obras Públika liu husi Institutu Jestaun Ekipamentus atu halo normalizasaun ba Estrada refere, Nune’e movimentasaun diresaun Zumalai ho Bobonaru bele la’o ho di’ak.
Entretantu, Estrada Diresaun Zumalai ba Bobonaru ne’e responsabiliza husi empreza Internasional ida husi Paíz Portugál iha ne’ebé fui alkatraun iha tinan kotuk 2022.
Hafoin notisia ne’e Públika, SAP News TL seidauk halo komfirmasaun ho Parte Kompaña no Ministériu Obras Públicas
Jornalista: SAPNewsTL