Delfim : Paskoa 2022, Tempu Espesial Ba Timor Oan Hili Nia Presidente Foun no Haklaken Damen, Domin, Unidade no Fraternidade Ba Sosiedade Timor-Leste.
Sapnewstl. Luro, 17 Abril 2022 : Iha Intrevista Sr. Delfim Markes hateten Paskoa tinan 2022 ida ne’e hanesan paskoa espesial ba Timor Oan hotu,tamba ida ne’e la’o hamutuk ho eventu ne’ebé estadu hala’o katak tinan ida ne’e eleisaun Presidensial 2022-2027. Kampanha no Eleisaun Prezidensial ne’e la’o hamutuk ho ita nia Serimónia Paskoa, entaun ita hakarak husu komunidade tomak, buat hotu tenki la’o iha domin, damen, amizade, unidade no fraternidade nia laran nafatin.
Delfim (eis Administrador Postu Luro) Akresenta Ita fiar katak eventu uma kreda ninian eventu estadu ninian la’o hamutuk iha semana ida , Eleisaun Presidensial 2022-2027 ne’e la’o hela iha semana santa paskoa ninian tamba ne’e, karik maromak nia planu hanesan ne’e ona, haraik ba ita ema no liu-liu sidadaun Timor-Leste ita nia orgaun soberania sira, ita nia lider nasional sira katak eventu rua ne’e sei la’o hamutuk iha tempu ne’ebé hanesan katak maromak sei haraik domin, paz, amizade, unidade, fraternidade ba sarani no povu tomak iha Timor-Leste.
Entretantu, Sr. Delfim Markes mos husu ba juventude sira liu-liu juventude sira ne’ebé hamahan-an iha foinsa’e katólika iha uma kreda nia mahon katak ita hotu tenki haklaken damen, haklaken domin, haklaken perdaun ba malu, haklaken lialos ba malu, maske ita moris iha partidu oioin, ita moris grupu arte marsiais no grupu arte ritual oioin maibé ita nia hanoin,ita nia objetivu ida deit katak ita tenki hare’e, tau matan, kria no estabelese seguransa iha ita nia area, knua, aldeia, suku, postu no munisipiu to’o nivel nasional. Tenik Sr. Delfim Markes Eis Administrador Postu Luro.
Ha’u hakarak hameno ba ita katak, Kristu nia moris hias halo ita,moris iha dame, domin no fraternidade, liu hosi paskoa ida ne’e mós FOSKA sira no foinsa’e sira nia fiar bele dezenvolve diak liu tan, metin no buras ba beibeik, katak ita la dook, ita la sees hosi uma kreda tamba maromak la dook hosi ita,maromak sempre akonpaña ita tamba ne’e ita sempre uza maromak nu’udar ita nia hun no abut lolos, atu ita bele hala’o ita nia moris ne’e iha sosiedade.
Enkuantu, Delfim Markes mos husu ba Timor oan hotu konsidera partisipasaun eleisaun ne’e ita nia responsabilidade, dever no obrigasaun ita sidadaun ida-idak nian, entaun ita tenki ba hili lider ida atu bele sustenta ita nia nasaun, lidera nasaun ba periodu Tinan Lima mai, uza ita nia konsiênsia katak ita maka nu’udar futuru ba nasaun ida ne’e ita tenki ezerse ita nia knaar ne’e, no konkretiza responsabilidade ida ne’e liu husi votasaun. dehan Delfim Ba Sapnewstl
Portantu, Ha’u nia esperansa katak povu hotu-hotu koñese didiak kandidatura sira nain rua (Dr. José Ramos Horta no Dr. Francisco Guterres Lu Olo), ita fiar katak ita hili nia karik sira na’in rua ne’e ida eleitu ba sai prezidente, sei sai prezidente ba ema hotu, prezidente ba nasaun tomak no prezidente ne’ebé bele lori Timor ne’e ba rai hotu-hotu hodi bele lori dezenvolvimentu ba ita nia povu no ita nia nasaun. Dehan Delfim, Luro 17/04.
Jornalista : Sergio Delekuar
Editor : Geraldo da Gama