Pe. Augusto : Espíritu Santa Paskoa Jesus Moris Hias, Hamoris Ita Ba Vota Determina Destinu Nasaun Ba Periodu Tinan Lima Mai
SAPNewsTL. Lautém, 16 Abril 2022 : Pe. Augusto Delfim de Sá hateten Espiritu Santa Paskoa inspira no fanun Ita hotu hakat ba Sentru Votasaun hodi deside, determina no hili ita nia presidente ba periodu tinan 2022 to’o 2027 iha loron 19 fulan Abril.
Pe. Augusto Delfim de Sá saran lia hirak ne’e, iha omilia Sábadu Aleluia ba komunidade Postu Administrativu Luro rihun ida resin ne’ebe partisipa iha misa ida ne’e. Amu Paroku ne’e hateten iha ita nia história Timor nian, ita nia kaminada de vida, kada periodu ita sempre realiza festa demokrasia hodi fo espasu no biban ba nia povu hili nia ukun nain ba Presidente Repúblika, nune’e bele lidera nasaun ba periodu ida.
Nia akresenta, eleisaun ida ne’e importante tebes ba povu Timor-Leste, povu Timor presiza ezerse nia dever siviku hodi kontribui ba processu konstrusaun estadu de direitu demokratiku tuir prinsipius, valores no normas demokrasia.
Ohin Jesus Kristu moris hias, eleisaun ne’ebe mai sai mos hanesan moris hias ida ba sosiedade Timor-Leste nian, hambrik ba vota, vota ba presidente, Espiritu Paskoa nian lori ita sai sarani ida deit, ema ida deit, maromak ida deit, timor oan ida deit, maske politika keta-ketak, organizasaun la hanesan no hanoin la hanesan, munispiu la hanesan maibe nudar maromak oan ita tenki respeita malu, hadomi malu, fo lima ba malu hodi lori desenvolvimentu klamar nian no isin nian ba ita nia povu. Pe. Augusto hateten, Luro, 16/04.
Espiritu Paskoa mos inspira ita atu labele beibeik separa malu, marzinaliza malu, abandona malu, labele fahe klase, labele minimiza ema no hamonu ema nia dignidade, tanba Jesus mai ba ema hotu, jesus la fahe klase, jesus la haree ba ema kiik ka boot, beik ka matenek, riku ka kiak, jesus mai hodi foti ema hotu hanesan no atu salva ema hotu-hotu husi sala, teruz no mate nia ukun.
Ha’u espera, ho eleisaun ida ne’e, ita bele hametin liu tan ita nia maturidade politika, amizade, fraternidade no unidade nu’udar Timor oan, ita labele hakotu ita nia relasaun. Interasaun no unidade tanba deit ita nia grupu diferente, partidu la hanesan no organizasaun la hanesan, ita tenki hamutuk hateke ba timor ida dook liu no diak liu. Dehan Pe. Augusto.
Enkuantu, misa ne’e hahú iha tuku 10:30 no remata iha 01:40 madrugada, hafoin loron fahe rua, iha misa ne’e hetan mos partisipasaun husi Eis Kandidatu Presidente Eng. Mariano Assanami Sabino Lopes ne’ebe selebra paskoa hamutuk ho familia Luro. Luro, 16 Abril 2022.
Jornalista : Sergio Delekuar
Editor : Luis Pailofo