Deputadu Dário Preokupa Arte Marsial Uza Atributu Tama Igreja no Serimónia Funerál Sira
SAPNewsTL, Dili : Deputadu Bankada Partidu Fretilin Dário Madeira husu governu tenke regula Arte-Marsial sira ho didi’ak atu sai duni arte ida desportiva nian, uza atributu iha tempu saida deit maibé uza iha tempu treinu nian iha sira-nia kampu rasik labele uza to’o fali iha igreja laran
“Ita-nia arte-marsiais sira ne’e ha’u preokupa, Ha’u konkorda arte-marsiais sira tenke loke, maibé husu ba governu tenke regula sira ho didi’ak sai duni arte ida desportiva nian, uza atributu iha tempu saida deit maibé uza iha tempu treinu nian iha sira-nia kampu rasik labele uza to’o fali iha igreja laran”. Tenik Deputadu Dário Madeira iha Uma Fukun Parlamentu Nasional, Dili, 27/06/2022
Nia hatutan, iha serimonia funerál sira ne’e mós arte-marsiais sira tama hotu iha laran, kuaze atu halakon ona ita-nia tradisaun, tanba tradisaun Timor nian ne’e kuandu ema mate tau tais, tau nia roupa orijen ka roupa família nian, maibé agora lae ona modifika totalmente ita-nia kultura ka tradisaun.
“Kuandu governu legaliza, husu governu tenke prova duni no governu tenke tau regra duni, kuaze arte-marsiais sira la’o loron-loron iha estrada sira ne’e uza atributu arte-marsiais hanesan atributu desportiva nian ne’e la iha tiha ona”. Nia informa
Deputadu ne’e mós husu arte-marsiais sira tenke kolabora ho governu kuandu legaliza tuir regra ida ne’ebé loloos.
Entretantu governu legaliza ona arte-marsiais hotu-hotu iha territóriu Timor-Leste, maibé membru arte-marsiais balu seidauk kumpri loloos lei ne’ebé governu kria ona.
Jornalista : Eduardo Moniz