Funsionáriu BTL Ba Hela Iha Foho, Komunidade Vikeke Halerik Ba Bee
SAPNewsTL, Dili : Deputadu Bankada Partidu Fretilin Dário Madeira hateten, Komunidade husi Munisípiu Viqueque difikulta hela ba bee moos tanba ofisiál (Petugas) ba bee moos ne’e hela iha foho, semana ida mak ba loke bee dala ida, lia hirak ne’e hato’o liu husi plenária iha Uma Fukun Parlamentu Nasionál, Segunda, 27/06/2022.
Deputadu Dário husu ba Bee Timor-Leste (BTL) Empreza Públika hodi orienta diresaun sira iha Munisípiu Viqueque, nune’e bele orienta funsionáriu sira servisu ho loloos no dignu
“Iha area Urbai ne’e tanki boot ida iha ne’eba, semana ida mak sira loke bee dala ida entaun loron seluk ne’e Komunidade sira ba buka bee, razaun tanba funsionáriu BTL sira ne’ebé rekruta tau iha ne’ebá ne’e, funsionáriu foun, nia ba hela fali iha foho, semana ida tun dala ida hodi loke bee”. Tenik Deputadu Bankada Fretilin Dário Madeira iha uma fukun parlamentu nasionál, Dili, 27/06/2022
Nia hatutan, funsionáriu ne’ebé servisu la loos la presiza kontratu, tanba preokupa liu ba ninia asuntu partikulár duké Komunidade ne’ebé presiza bee, funsionáriu ida ne’e la merese tanba lakohi serví povu.
“Kuaze suku hotu-hotu iha Viqueque ne’e parteira la iha ona, inan isin rua ne’ebé mak atu partu ne’e, Komunidade rasik mak buka ambulánsia hodi tula inan isin rua ba iha Munisípiu nian, la’ós ida ne’e maibé Doutór sira ne’ebé uluk primeiru governu haruka mai fali atu destaka ba suku-suku sira ne’e to’o agora deit mós doutór maioria la iha tiha ona, hanesan iha foho ne’eba ne’e maske postu saúde balu Komunidade labele konsulta tanba doutór la iha”. Tenik nia
Nia hatutan, Iha semana rua tolu liubá Komunidade balu hetan moras sira labele mai iha Watulari Vila tanba estrada ladiak, ne’ebé husu ba Ministériu Saúde tenke haree ida ne’e.
“Se bele Inspetur Ministériu Saúde ne’e ba haree tuir, Xefi Postu Saúde sira mós dala ruma la kontrola to’o iha sentru saúde no mós postu saúde iha suku-suku sira ne’e”. nia hakotu
Jornalista : Eduardo Moniz