Deskonfia Ameasa Estudante ! Senadu Jeral UNTL Sadik Dr. Abilio Halo Debate
SAPNewsTL, Dili : Relasiona ho estudante Departamentu Pescas e Ciência Marinha (DPCM), Fakuldade Agrikultura (FAGRI), Universidade Nasional Timor Lorosa’e (UNTL) ne’ebe hetan ameasa husi sira nia Diretor DPCM, Senadu Jeral UNTL Cristovão de Araújo dejafia (sadik) Professor Doutor Abilio da Fonseca hodi halo debate aberta
Senadu Jeral UNTL Cristovão de Araújo hateten, aktu ne’ebe mak Professor Doutor Abilio da Fonseca halo hodi ameasa estudante Departamentu Pescas e Ciência Marinha ne’e aktu intimidasaun ne’ebe kontribui ba estudante la seguru aprende iha prosesu ensinu aprendijajem
“Relasiona ho Professor Doutor Abilio da Fonseca ne’ebe ameasa estudante Departamentu Pescas e Ciência Marinha, ami konsidera katak aktu ne’e intimida no kontribui ba estudante la seguru iha prosesu ensinu aprendijajem, se estudante krítika dosente nia aktu ne’ebe lalos, dosente tenki justifika la’os ameansa”. Tenik Senadu Jeral UNTL Cristovão de Araújo ba jornalista sira iha Kampus Sentral UNTL, 20/10/2023
Senadu Jeral UNTL Cristovão de Araújo hatutan, aktu ameasa estudante lalos aktu ne’ebe eduka estudante maibe hatauk estudante, halo estudante la seguru no halo estudante psikolojikamente la seguru iha prosesu ensinu
“Aktu ameasa estudante lalos aktu ne’ebe eduka estudante maibe hatauk estudante, dosente ne’ebe profisional no iha maturidade, nia sei la ameasa nia estudante, nia sei buka meius rezolve estudante ninia problema, sira mesak títulu professor no doutor deit, sira mak iha kunhesimentu diak atu rezolve problema estudante nian laos haruka estudante nonok”. Nia dehan
Senadu Jeral UNTL ne’e aprofunda, estudante mai universidade lalos atu adora dosente, maibe atu aprende siénsia no buka lialos
“Estudante mai universidade atu buka siénsia hodi aprende no buka lialos lalos atu adora dosente, ami husu estrutura universidade atu kria kondisaun ida hodi halo diskusaun aberta, se la simu, ami prontu halo debate, UNTL iha regras, normas no kódigu konduta hodi regula wainhira estudante halo sala.”
“Dosente ne’ebe la kompriende lei no regra maka dosente Abilio da Fonseca, ami dejafiu (Sadik), se la simu, ami prontu debate ho nia tanba nia la kompriende saida mak hakerek iha konstituisaun kona ba liberdade expresaun”. Senadu Jeral UNTL sublinha
Porta voz Bendito dos Santos informa, Departamentu Pescas e Ciência Marinha, iha Dosente ida naran Dr. Abilio da Fonseca, atualmente exerse hela funsaun nu’udár Diretor Departamento Pescas e Ciência Marinha iha ne’ebé ameasa estudante tanba estudante sira ezije sira nia direitu kona ba valor ne’ebe fo la nakloke no hamosu desigualidade
“Iha Departamentu Pescas e Ciência Marinha, iha Dosente ida naran Dr. Abilio da Fonseca, atualmente exerse hela funsaun nu’udár Diretor Departamento Pescas e Ciência Marinha, ameasa estudante sira mak ezije sira-nia direitu atu hatene prosesu fo valor ne’ebé la transparante,”
“Maibé dosente refere hatan ba estudante nia preokupasaun ho liafuan ameasa dehan “imi sai ha’u nia Inimigu Permanente no ita boot sira sei kona ajar bainhira kontra saida mak ha’u halo”, no aktu ida ne’e sei akontese nafatin iha prosesu aprendisajem. ami estudante konsidera aktu refere hatudu dosente Dr. Abilio da Fonseca laiha profisionalidade no laiha maturidade nu’udar dosente ka edukador ne’ebé diak”. Bendito dos Santos hateten
Nune’e, Estudante sira fo sai ba publiku liu-liu inan-aman, sosiedade akadémika hotu no Ministériu Ensinu Superior, Siénsia no Kultura atu hatene katak, estudante mai eskola tuir prosesu aprendisajem iha presaun, intimidasaun, violasaun, diskriminasaun no opresaun nia laran, maske tuir Knananuk Hino Nacional hananu katak “TERRA LIVRE no POVU LIVRE” no UNTL rasik iha programa Inisiativu Kampus Seguru maibé realidade oin seluk tebes.
Enkuantu, Estudante sira husu ba Magnífiku Reitor ho estrutura tomak atu rezolve kedas ba aktu dosente ameasa estudante no garante katak estudante sira hotu bele seguru iha prosesu ensinu no aprendisajem, nune’e labele akontese tan presaun, intimidasaun, violasaun, diskriminasaun no opresaun ho forma saida deit, iha prosesu aprendisajem.
Entretantu, SAP News TL mos tenta hodi halo konfirmasaun ho estrutura topu universidade nian inklui Estrutura Fakuldade kona ba kazu ne’e, maibe parte relevante sira sei okupadu ho servisu seluk, nune’e Estrutura UNTL seidauk fo resposta ba kazu ne’e.
Jornalista : Ermelinda Soares