Realiza Kampionatu Nasional ! Silvester : Tempu Ona Hodi Hatudu Talentu
SAPNewsTL, Dili: Ikatan Keluarga Silat Putera Timor-Leste (IKS-PTL) Kera Sakti realiza kampionatu nasional dahuluk iha Timor-Leste hafoin sira estabelese sira nia organizasaun iha loron 15 janeiru 1996 iha nasaun ne’e
“Ohin ita realiza kampionatu nasionál ida ne’e dahuluk ba istoria lKS-PTL Kera Sakti iha Timor Leste nain hafoin ita harii IKS-PTL Kera Sakti iha Timor-Leste iha loron 15 Janeiru 1996,”Tenik Prezidente IKS-PTL, Silvester Siqueira Sufaba jornalista iha Jináziu Desportu Dili (GDD-sigla Portugss), Caikoli, Dili kinta (19/10/2023)
Prezidente IKS-PTL hatutan, objetivu husi kampionatu nasionál IKS-PTL Kera Sakti ne’e hanesan matadalan ba membru sira, atu nune’e hatudu talentu no tau prioridade ba desportu. Sira laiha ona tempu atu estraga enerjia iha fatin públiku tanba tempu ona hatudu talentu iha kompetisaun nasional no internasionál sira.
Nune’e nia husu ba membru IKS-PTL Kera Sakti prepara didiak iha kampionatu nasional ida ne’e hatudu talentu no kampionatu nasionál sei kontinua to’o munisípiu sira iha futuru hodi define atleta sira hosi ranting to’o sukursál sira, partisipa iha kampionatu nasional iha futuru.
Nia informa tan, kampionatu nasionál ne’e hahu 19 to’o 22 Outubru 2023, partisipa husi atleta 120 mai husi kada sukursal 15 iha munisipiu 12 ho RAEOA feto mane nain ualu no ofisial nain-40, manan nain iha kampionatu nasional ida ne’e sei hetan premiu hanesan manan dahuluk sei hetan orsamentu montante 250 USD, manan nain daruak hetan 200 USD, manan nain datoluk hetan 100 USD husi klase A to’o E.
Iha fatin hanesan, Ministru Juventude Desportu Arte no Kultura (sigla portuges MJDAC), Nélyo Isaac Sarmento hatete, nia prezensa hakarak sai testemuña importante ba istória IKS-PTL Kera Sakti iha Timor Leste hein katak depois kampionatu ne’e lakoi rona tan inan aman sira tanis maibe hakarak matanbeen tun hetan prestasaun lori Timor-Leste nia naran morin iha jogu internasional sira.
“Ha’u nia prezensa hakarak sai testemuña importante ba istória IKS-PTL Kera Sakti iha Timor Leste, ami hakarak sai testemuña ba kampionatu nasionál dahuluk ba IKS-PTL Kera Sakti atu hamosu atleta prestasaun hodi lori ami orgullu ba imi nia atividade ne’e, povu Timor-Leste hein katak depois kampionatu ne’e ami lakoi rona tan inan aman sira tanis tan tanba imi nia hahalok, ami hakarak ami nia matanbeen tun bainhira imi hatudu imi nia prestasaun hodi lori Timor-Leste nia naran morin iha jogu internasional,”
Nelyo afirma tan, nia hakarak agradese ba estrutura IKS-PTL Kera Sakti organiza kampionatu nasional ne’e, keta haluha governu sempre hamriik hamutuk atu dezenvolve atividade desportu ba oin para hetan atleta kualidade.
Liu husi kampionatu nasional ne’e atleta ho nia treinador sira atu hatudu treinu sira durante pratika ne’e hodi hare’e no hadia an neineik bele sai atleta profesional iha IKS-PTL Kera Sakti nian.
Kampionatu nasional ne’e bele kunese malu, kria unidade no paz ho valoriza sportifita lakon manan laos problema naran katak kunese malu haforsa nasaun ne’e tanba nasaun ne’e eroi sira lakon sira nia vida para ohin loron hetan liberdade.
Entretantu, atleta sira mai husi sukursal partisipa kampionatu nasional IKS-PTL Kera Sakti ne’e mak sukursal Lautem, Baucau, Viqueque, Manatuto, Dili Leste, Dili Central, Dili Oeste, Aileu, Ainaro, Manufahe, Covalima, Ermera, Liquiça, Bobonaro no RAEOA.
Reportajen: Augusto dos Santos