Problema Barak Tebes ! CONTL Sei Submete Relatoriu Asian Games
SAPNewsTL, Dili: Komite Nasional Olimpiku Timor-Leste (sigla portuges CONTL) sei submete relatoriu partisipasaun atleta husi federasaun sanulu iha jogu Asian Games 2023 Hangzhou, China ba governu liu husi Ministério Juventude Desporto Arte Cultura (MJDAC).
“Reuniaun ohin, ita halo avaliasaun ba federasaun 10 foin daudauk tuir Asian Games 2023 iha Hangzhou, China. Nune’e ita koalia kona ba preparasaun rai laran, preparasaun dokumentu, viajen, akomodasaun, kompete jogu no kolia orsamentu mai husi governu ba kompete Asian Games,”
“Tuir lolos ita tenki submete relatoriu sedu ba governu bainhira delegasaun to’o Timor-Leste maibe agora federasaun rua deit mak hatama ona relatoriu ba orsamentu apoiu husi governu ba atleta sira kompete Asian Games nian, no sira seluk seidauk submete, ami sei husu para iha loron kuarta-feira semana oin, federasaun sira hatama hotu ona relatoriu para iha loron sexta-feira ita submete relatoriu sira ne’e ba governu”, dehan Vise Presidente CONTL Mateus da Cruz ba jornalista sira iha edifisiu CONTL Colmera, Dili kinta (19/10/2023).
Mateus hatutan, rezultadu husi avaliasaun ne’e federasaun sira hato’o problema barak tebes, federasaun barak liu koalia la tuir technical meeting maibe ne’e laos CONTL mak lakoi haruka sira ba sedu maibe sistema jogu Asian Games mak haruka loron rua antes atu abertura mak federasaun sira to’o iha China.
Nia informa tan, problema barak mosu tanba federasaun sira seidauk hatene sira nia pozisaun tanba maioria ba partisipa Asian Games ne’e treinador barak la priense rekezitu, ezemplu treinador boxe tenki fitun rua no taekwondo tenki nivel-3 maibe Timor-Leste seidauk iha.
Nune’e CONTL tenki lobi komisaun organizador atu sira akompaña atleta partisipa jog, ba oin federasaun sira tenki husu ba sira nia federasaun internasional sira para fasilita sira antes ba partisipa jogu internasional sira.
Vise Prezidente CONTL ne’e esplika tan, federasaun ne’e mak partisipa eventu internasionál, sira tenke hato’o preokupasaun antes aranka husi Timor ba nasaun ne’ebé realiza jogu ne’e, ho problema federasaun sira enfrenta, CONTL nafatin halo komunikasaun ho federasaun sira, atu nune’e labele akontese tan iha futuru.
Entretantu, modalidade 10 hanesan, modalidade Boxe, federasaun Tiru, Taekwondo, Karate-do, Tennis Kampu, Badminton, Natasaun, Atletizmu, Voleibol Praia no Halterfilizmu.
Reportajen: Augusto dos Santos