Despede Traballador 82 ! SEFOPE Sei Teste Feto Sai Kondutora

SAPNewsTL, Díli – Ohin Sekretáriu Estadu ba Formasaun Profisionál no Empregu (SEFOPE) no Diresaun Nasional Empregu Estrangeiru (DNEE), hala’o despedida no asina deklarasaun ba traballadór Timor-oan nain-82 atu ba servisu iha Australia.

Diretor Jeral SEFOPE Carlito do Rosario Cabral, haktuir ohin halo despedida ba traballadór sira ne’ebe atu ba servisu iha Australia hamutuk nain-82 traballadór, SEFOPE sempre halo despedida ofisial bainhira traballadór sira ne’ebe ba servisu iha Australia tanba sira ba reprezenta nasaun.

“Kriteria kompañia presiza feto ne’ebé hatene lori karreta, tanba atu transporta sasan sira ne’ebé iha konpañia, toos, no industria presiza transporte. Lori karreta la’os proibidu, maibe proibidu ba sira ne’ebé sim (karta kondusaun) laiha no hemu tua lanu, ida ne’e mak ita bandu atu labele komete”. Hateten Diretor Geral SEFOPE, Carlito do Rosario Cabral ba jornalista sira iha Suai Room Timor Plaza, Segunda-Feira, 13/05/2024.

Diretor Geral Sekretáriu Estadu ba Formasaun Profisionál no Empregu (SEFOPE) Carlito do Rosario Cabral, informa daudaun ne’e sira prepara traballadór nain-14 ne’ebe iha ona Japão iha area agricultura nian, iha provinsia ida bolu naran Kochi.

 

Carlito dehan tan, iha tempu badak ema nain-10 iha fulan kotuk husi konpañia rasik mai fó teste ba Timor-oan hodi ba servisu iha area industria.

 

“Sira nain sanulu (10) preparadu hein prosesu balun, Visa no mos dokumentus balu atu ba servisu iha industria/fabrika Ró. Iha tan akordu ida, Xefe Estadu mak asina ho konpañia no sei halo rekrutamentu ba ita nia ema iha area agrikultura nian.”

Iha parte seluk, Diretor Jeral ne’e hateten liga ba vaga online ne’ebe hala’o ona teste, SEFOPE sei konvida KAK no PDHJ hodi asiste prosesu koreksaun.

“Vaga online ita halo teste iha munisipiu hotu-hotu, ho teste eskrita ita seidauk publika sai tanba daudaun ne’e prepara hela atu halo koreksaun ba materia ne’ebe sira teste, ita sei konvida instituisaun sira hodi mai asiste karik Iha posibilidade hanesan KAK, no PDHJ atu mai partisipa durante halo koreksaun, atu bele garante katak prosesu ne’ebé maka ita halo, iha ema balun hateten katak iha nepotizmu, familiarizmu, partiliarizmu, politiza ita atu evita”, Tenik nia.

Entretantu, tuir dadus ne’ebé mak hetan, total traballadór ne’ebe atu ba servisu iha Australia hamutuk ema nain-82, mane hamutuk hitunulu (70), feto hamutuk sanulu resin rua (12). Iha traballadór foun hamutuk nain-31 no Reentry hamutuk nain-51.

Traballador hirak ne’e sei aranka ba Austrália iha tempu badak no sira sei ba servisu iha area agrikultura.

Jornalista : Dircia Baptista Belo & Marciana da Conceição