Evita Partidariza, SEFOPE Sei Involve KAK & PDHJ Iha Koresaun
Imajem : Traballador Timor Oan 82 Ne’ebe Halo Despedida Hodi Ba Servisu Iha Austrália, Timor Plaza, 13/05/2024. Foto : Marciana da Conceição
SAPNewsTL, Díli – Hafoin halo despedida ba traballador hamutuk 83 iha Suai Room Timor Plaza, Diretor Jeral Sekretáriu Estadu ba Formasaun Profisionál no Empregu (SEFOPE) Carlito do Rosario Cabral informa koreksaun teste vaga online sei involve husi KAK & PDHJ, nune’e bele evita nepotizmu no partidarizmu iha laran.
Diretor Jeral ne’e hateten liga ba vaga online ne’ebe hala’o ona teste, SEFOPE sei konvida KAK (Komisaun Anti Korupsaun) no PDHJ (Provedoria dos Direitus Humanus e Justisa) hodi asiste prosesu koreksaun.
“Vaga online ita halo teste iha munisipiu hotu-hotu, rezultadu teste eskrita ita seidauk publika sai tanba daudaun ne’e prepara hela atu halo koreksaun ba materia ne’ebe sira teste, ita sei konvida instituisaun sira hodi mai asiste karik iha posibilidade hanesan KAK, no PDHJ atu mai partisipa durante halo koreksaun”. Tenik Diretor Jeral SEFOPE Carlito do Rosario Cabral ba jornalista sira iha Salaun Suai Room Timor Plaza, Dili, 14/05/2024.
Carlito Cabral hatutan, objetivu husi involve instituisaun rua ne’e hodi hola parte iha prosesu koresaun ne’e hodi garante transparensia tanba ema balun hateten katak mosu nepotizmu no partidarizmu.
“KAK & PDHJ bele asiste prosesu koresaun, atu bele garante katak prosesu ne’ebé maka ita halo, iha ema balun hateten katak iha nepotizmu, familiarizmu, partidarizmu no politiza, ita atu evita”, Tenik nia.
Entretantu, ohin SEFOPE despede ona traballador ba servisu iha Australia hamutuk ema nain-82, kompostu husi mane hamutuk hitunulu (70), feto hamutuk sanulu resin rua (12). Iha traballadór foun hamutuk nain-31 no Reentry hamutuk nain-51.
Traballador hirak ne’e sei aranka ba Austrália iha tempu badak no sira sei ba servisu iha area agrikultura.
Durante fulan lima iha tinan ida ne’e, SEFOPE haruka ona traballador rihun ida resin ba servisu iha rai-liur, entre sira balun foin ba no balun re-entry (ba fila fali).
Despede Traballador 82 ! SEFOPE Sei Teste Feto Sai Kondutora
Jornalista : Dircia Baptista Belo & Marciana da Conceição