Dezenvolve Desportu, MJDAK Sai Prezidente KND Ba Tinan 5

SAPNewsTL, Dili: Estrutura Foun Komisaun Nasional Desportu (KND) simu tomada pose ba tinan lima, Estrutura foun ne’e sei halo fiskalizasaun no hare’e atividade desportu sira inklui organizasaun desportiva iha Timor-Leste

“Ohin ita halo reuniaun ba KND depois halo alterasaun ba lei KND nian tanba ita iha ona nomeiasaun ba membru KND foun sira”,

“Nune’e reuniaun dahuluk ne’e atu fo hatete importansia KND nian ba komisariu sira katak sira atu halo fiskalizaaaun no hare’e atividade desportu sira inklui organizasaun desportiva iha Timor-Leste”, dehan Presidente KND Nelyo Isaac Sarmento ba jornalista sira iha edifisiu MJDAC Lecidere, Dili sesta (13/10/2023).

Prezidente hatutan, iha reuniaun sira iha ona desizaun ba atribui premiu ba atleta prestasaun sira mak hanesan atleta espesial olimpiku hetan prestasaun iha nasaun Alemaña, atleta hetan prestasaun iha Sea Games 2023 iha Cambodia no atleta paralimpiku hetan prestasaun iha Sea Para Games Solo, Indonesia.

Desizaun seluk mak fo CDTL atu hari’i organizasaun profesional hola parte iha KND tanba iha Timor-Leste seidauk estabelese asosisaun ba arbitrajen modalidade hotu nian, asosiasaun ba atleta profesional KND halo analizasaun ba kriasaun komisaun anti dopazen nian tanba kriteria importante ba atleta Timor-Leste partisipa jogu internasional sira, KND ne’e jeralmente iha komisariu hamutuk nain-11.

Iha fatin hanesan, Sekretáriu Ezekutivu KND João Rodrigues hatete, ohin tomada pose ba estrutura KND foun sira no reuniaun dahuluk nune’e sira fahe ona servisu ba komisariu sira para reuniaun tuir mai iha servisu konkreta ba KND rasik “Ohin ita halo reuniaun dahuluk no tomada pose ba estrutura KND foun ba tinan lima nian nune’e ita ohin komesa fahe ona servisu ba komisariu sira hanesan toma konta ba selesaun nasional, alta kompetisaun no sira seluk atu nune’e reuniaun tuir mai ita iha servisu konkreta ba KND ne’e rasik”, tenik João João informa tan, KND antes ne’e estabelese ona no sira halo ona desizaun ba atribui premiu apresiasaun ba atleta sira maibe ohin halo tomada pose ba komisariu foun sira ba tinan lima nian

Sira sei halo reuniaun kada fulan tolu, KND mak sei oferese utilidade publiku ba federasaun sira nune’e servisu dahuluk KND halo sei manda karta ba organizasaun desportiva sira iha Timor-Leste halo rekerimentu mai KND depois KND sei verifika merese duni sai organizasaun desportiva tanba daudaun ne’e federasaun barak maibe balun atleta ida rua deit.

Entretantu, Estrutura foun KND ba tinan lima mak Presidente KND lidera direitamente husi Ministru Juventude Desportu Arte Kultura Nelyo Isaac Sarmento, Sekretáriu Ezekutivu KND João Rodrigues ho nia komisariu sira mak reprezentante husi CDTL, reprezentante Ministériu Edukasaun no Ministériu saúde, atleta profesional ho non profesional, arbitrajen, reprezentante CPNTL, reprezentante CONTL, reprezentante espesial olimpiku no reprezentante husi ekipa tekniku edukasaun fizika nian

Jornalista : Augusto dos Santos