DIT Manan Kablaki 5-1 Kontinua Lidera Tabela Klasifikasaun

SAPNewsTL, Dili: DIT FC manan Kablaki FC ho skore 5-1 iha jornada dalimak  nune’e provizoriamente kontinua lidera tabela klasifikasaun divizaun daruak Liga Timorense epoka 2023.

Jogu DIT FC kontra Kablaki FC hala’o iha Estadium Munisipal Dili domingu (9/04/2023).

Iha jogu parte dahuluk bainhira kick off jogador sira husi ekipa rua halo jogu muda bola ain ba ain hodi halo presaun no kontra atake ba malu ne’ebe DIT FC halo rua tuirtuir malu iha minutu 12 husi jogador Elvis Silva no iha minutu 13 husi jogador Bonaventura Klau hatuur kedas skore ba 2-0.

Skore 2-0, halo jogador sira husi Kablaki FC halo jogu tenta atu marka golu maibe jogador adversariu sira la fo oportunidade no jogador sira husi DIT FC mantein jogu halo presaun ba adversariu atu aumenta tan golu maibe la konsege mos maski ekipa iha oportunidade ameansa baliza kada ekipa nian ne’ebe minutu 45 jogu parte dahuluk remata DIT FC lidera nafatin ho skore 2-0.

Tama ba jogu parte daruak nian ekipa rua muda estratejia jogu nian nafatin halo presaun no kontra atake ba malu, tama ba minutu 58 jogador Rui da Costa husi DIT FC marka tan golu hodi muda skore ba 3-0.

Rezultadu refere halo Kablaki FC halo jogu nafatin hasa’e ritmu jogu nian hodi tenta marka golu hodi muda skore maibe la konsege ne’ebe tama minutu 63 Kablaki FC sofre tan golu husi jogador DIT FC Jose dos Santos muda fali skore ba 4-0.

Skore 4-0, jogador sira husi Kablaki FC nafatin halo atake makaas ba DIT FC konsege marka golu husi jogador Jose Campos iha minutu 81 muda fali skore ba 1-4, DIT FC aumenta tan golu iha minutu 83 husi jogador Elvis da Silva muda fali skore ba 5-1 to’o minutu 90 remata jogador sira husi ekipa rua la aumenta tan golu ona tan ne’e jogu remata ho 5-1 rezulta DIT hetan vitoria ho pontu tolu provizoriumente lidera tabela klasifikasaun divizaun daruak Liga Timorense epoka 2023.

Depois jogu remata asistente treinador Kablaki FC Nazario de Araújo dehan, rezultadu jogu nune’e maski iha jogu sira konsege hamate dominansia jogu adversariu maibe golu rua tuirtuir malu hamate kedas mentalidade jogador sira sira nian.

“Rezultadu jogu hanesan ne’e tanba iha lakon ho manan, jogador sira esforsu ona mak ne’e tanba iha jogu parte dahuluk iha minutu 10 dahuluk ami konsege hamate DIT FC nia dominansia maibe hau nia jogador sira halo faila jogador sira husi DIT FC marka golu rua tuirtuir malu hamate kedas mentalidade jogador sira nian”, tenik Nazario 

Nazario hatutan, iha jogu parte daruak jogador ida hetan kartaun mean susar tebes atu rekupera sofre golu sira iha maski sira koko atu hamenus golu maibe DIT FC ho jogu intensidade as marka tan golu tolu rezultadu ikus sira derrota no jogu tuir mai sira sei hadia mentalidade no fiar an jogador sira nian atu hatudu jogu diak.

Iha sorin seluk asistente treinador DIT FC Jacinto Belo hatete, tuir lolos jogador sira hatama golu barak no jogu tuir mai sira sei kontinua prepara tanba sei kontra ekipa diak Lica Lica Lemorai FC 

“Hau nia jogador sira halo jogu iha parte dahuluk ladun diak tanba tuir lolos sira hatama golu barak maibe la konsege aproveita oportunidade maibe iha jogu parte daruak ami konsege muda estratejia entaun ami manan jogu ne’e no jogu tuir mai ami sei kontinua prepara tanba sei kontra ekipa diak Lica Lica Lemorai FC maibe ami iha esperansa sei manan jogu ne’e”, Jacinto hateten

Entretantu iha jogu ne’e DIT FC halo substituisaun ba jogador nain lima no Kablaki FC troka jogador nain lima mos, jogador Bonaventura Klau husi DIT FC hetan kartaun kinur no jogador Jorge Alves husi Kablaki FC hetan kartaun kinur rua sai mean, vitoria ne’e lori DIT FC provizoriumente lidera tabela klasifikasaun divizaun daruak Liga Timorense epoka 2023 ho pontu 13 husi jogu manan dala haat ho impata ida no derrota ne’e halo Kablaki FC okupa pozisaun dahitu husi jogu manan ida no lakon haat.

Reportajen: Augusto dos Santos