Dr. Horta : Se Eleitu Ba PR, Ha’u Sei Buka no haku’ak Lu Olo no Alkateri, Rai Ne’e Laiha Inimigu, Ita Presiza Servisu Hamutuk Ba Oin

Lautém, 10 Abril 2022 : Komisiu Kandidatu Presidente Repúblika Demokrátika de Timor-Leste Periodu 2022-2027 iha Munisipiu Lautém Dr. José Ramos Horta hateten, Se ha’u manan ba Presidente Repúblika ha’u sei hakuak Dr. Francisco Guterres Lu Olo no Dr. Mari Alkateri, ha’u sei promove no hametin dialogu nasionál hodi kontribui ba dinamizasaun desenvolvimentu ekonomia, sosial no agrikultura inklui adezaun Timor-Leste ba Azean no dada investidores sira husi estrangeiru mai investe iha nia rain.

Kandidatu Presidente Dr. José Ramos Horta deklara, ‘se ha’u manan karik sei buka Dr. Fancisco Guterres Lu olo no Dr. Mari Alkateri ho lider sira iha Fretilin, Rai ne’e labele iha inimigu, ita hatudu ba mundu ezemplu diak ida iha rekonsiliasaun nasionál no rekonsiliasaun ho Indonésia, ne’e duni, eleisaun hotu tiha, Presidente ida ne’e sei buka halo dialogu ho hotu-hotu. nune’e, povu bele moris hakmatek, mundu bele haree Timor iha konfiansa hodi investe iha Timor-Leste.

Kandidatu Presidente Dr. Ramos Horta afirma Munisipiu Lautém, Baucau no Vikeke importante tebes ba desenvolvimentu nasionál Timor-Leste nian, ita labele haree deit munisipiu ida separadu, Munisipiu Baucau, Vikeke no Lautém tenki integradu ekonomikamente.

Ita tenki desenvolve ninia zona turístiku sira importante, maibe Turizmu deit mos la sufisiente, entaun ita mos tenki desenvolve didiak agrikultura liliu Pekuária iha Lautém, iha Baucau bele sai sentru komersial boot ida ho investidor husi liur mai hodi halo Baucau sai sentru armazem ida, no iha Vikeke  ita tenki desenvolve ninia Agrikultura. Hatete Ramos Horta iha Lautém, 10 Abril 2022

Ita tenki halo dialogu resolve problema iha Parlamentu laran no ita halo dialogu hodi haree oinsa ita hari’i guvernu foun ida, nune’e ita labele lakon tempu barak  tan, . Ita tenki kaer ita nia ekonomia, ita tenki buka dalan tama ba ASEAN.

Dr. Ramos Horta hatutan, Ita tenki hadia ita nia lei investimentu Timor-Leste nian, hatur lei no justisa ho lolos, ita tenki bolu investidores sira husi Europa, Indonesia, Corea, Malaisia, Tailándia no singapura hodi halo investimentu iha ita nia rain hodi dinamiza ita nia ekonomia.

Estadu tenki investe iha infraestrutura estrada, eletrisidade, saneamentu, formasaun humana, formasaun teknika profisionál, ida ne’e ita tenki resolve iha tinan lima nia laran, Tanba ne’e maka ha’u soe tiha komprimisiu internasionál lubuk ida, taka tiha kontratu sira ha’u iha ho institutu balu hodi simu todan kandidatu an ba Presidente da Repúblika Tinan lima mai.

Nune’e vota ba númeru sorteiu 1, ha’u pronto atu servi imi, inan aman sira, jovens sira no povu Timor-Leste. Dr. Ramos Horta Afirma iha Lautém, 10 Abril 2022, Jornalista Absalão da Costa Lopes, Média Sapnewstl.

Jornalista : Absalão da Costa Lopes

Editor       : Sergio Delekuar