Ema Nadodon Tama TL, Mandati Trizte Jovens Buka Moris Iha Ema Rain
SAPNewsTL, Dili, 08/07/2022: Deputadu Bankada Fretilin David Mandati Dias Ximenes hateten, resesu ne’e normal, reuniaun ne’e maratona tebes, maibé presiza tempu, kona-bá férias ne’e iha responsabilidade sosiál la’ós tan deit partidu maibé mós moris iha sosiedade nia leet, sosiedade ne’e presiza esklaresimentu.
“Ami ko’alia kona-bá dezempregu iha ita-nia rai laran, ami senti tristi tebe-tebes kuandu ita haree ba ita-nia forsa produtiva ne’ebé atu lori Timor-Leste ne’e ba oin, ita ko’alia ibun boboot dehan katak juventude ne’e mak futuru ba nasaun, agora juventude mak futuru ba rai seluk, sira ba ema nia rai osan ne’ebé mak sira hetan, osan hirak ne’e haruka mai ninia família. enkuantu ita-nia ema nadodon sai, ema seluk mós nadodon tama mai, osan tama mai, maibé osan sai fali ita aproveita saida, tanba ema seluk mós tama nadodon iha ita-nia rai”. Tenik Deputadu Bankada Fretilin David Mandati Dias Ximenes
Nia hatutan, ne’e responsabilidade sidadaun hotu-hotu nian, tuur hanoin oinsá mak bele halo desenvolvimentu ho diak
“Ita ukun aan tinan 20 ona, ita la’o iha funu laran, ita ida ne’e la promete ba ita-nia povu, bainhira ita promete ba ita-nia povu no atu forma estadu ida primeiru ita fo seguransa ba ita-nia povu, tanba ema seluk mak mai seguransa ba ita-nia povu la to’o, mai fo seguransa ba ita hodi oho fali ita, tanba ne’e mak ita hakarak atu ukun rasik aan”. Nia Sublinha
Deputadu Bankada Fretilin ne’e mos haklean justisa mak hanesan vontade konteudu perpetua, ema ida-idak saida mak ninia direitu, povu ne’e ninia direitu primeiru uma, hatais no hahan liu tiha ida ne’e edukasaun ba nia oan sira, saude di’ak
“Juventude barak ba buka moris iha rai li’ur razaun tanba lakohi kiak iha Timor, agora dadauk ita Timor ne’e buka sorti, se mak lais bele hetan sorti, Timor-Leste seidauk dezenvolve ho di’ak ba ita-nia agrikultura, agora dadaun ita-nia agrikultura sei tradisional”. Dehan nia
Entretantu, Timor-Leste agora dadaun sei nakonu ho dezempregu, kiak no susar tanba iha rai laran seidauk dezenvolve setor vital sira hanesan agrikultura, turizmu no edukasaun ho di’ak liliu menuz kriasaun oportunidade empregu ba nia sidadaun sira
Jornalista : Eduardo Moniz
Editor : SAPNewsTL