Embaixador Costello Audiénsia Ho SEJD, Merkadu Traballu Iha Austrália Ezije Abilidade
SAPNewsTL,Dili: Sekretáriu Estadu Juventude no Desportu (SEJD) Abrão Saldanha hala’o sorumutu ho Embaixador Australia Bill Costello hodi ko’alia kona-ba kooperasaun juventude no desportu nian ba futuru
Iha entervista Sekretariu Estadu Juventude no Desportu Abrão Saldanha haktuir nia konvida embaixador Australia atu ko’alia kona-ba aktividade juventude no desportu iha Timor Leste no atu dezenvolve juventude no desportu iha futuru.
“Ami konvida embaixador foun ne’e atu mai fo briefing ida kona-ba aktividade juventude no desportu iha ita nia rai no servisu sira ne’ebé halo iha ita nia rai no eksplora posibilidade sira ne’ebé maka bele servisu hamutuk ho governu Australia atu dezenvolve seitor juventude no desportu nian ba future, programa dezenvolvimentu Austrália nian ne’ebé eziste ona iha Timor Leste oinsa mak bele kanaliza no ajuda programa balun ba área juventude no desportu”. Dehan Sekretáriu Estadu Juventude no Desportu ba jornalista sira iha salaun enkontru SEJD, Kinta-Feira, 11/08/2022
Sekretáriu Estadu ne’e akresenta tinan oin Australia no Nova Zelandia mak sei sai uma nain ba kopa mundial feto no tinan ida ne’e sei haruka ekipa ida ba iha Sudeste Aziatiku.
“Estadu Australia no Nova Zelandia tinan oin sei sai uma nain ba kopa mundial ba feto sira, eventu ida ne’e sira bele espalla atividades ruma iha rejiaun ne’e atu bele komemora antes ba to’o iha kopa mundial feto ho atividade esensial sira husi Nasaun sira, ne’ebé ha’u mos informa katak ita mos hahú ona investe iha futebol Femenina, hahú ona iha Kopa ba sira no tinan ida ne’e ita haruka ekipa ida duni ba rejiaun Sudeste Aziatiku no partipasaun feto hahú iha agora”. Tenik nia
Nia hatutan, embaixador Australia seidauk iha programa espesifiku ba formasaun treinador sira maibé nia sei ko’alia ho governu Australia ba asuntu ida ne’e.
“Ami seidauk esplika detallu no ha’u aprezenta deit nesesidade sira try out hanesan troka esperiénsia ekipa nasional, treinador, atu bele fo oportunidade ba treina, bolsu estudu iha area desportu nian, oinsa mak fo formasaun ba treinador sira, jestor administradores de desportu; buat sira ne’e mak ha’u koloka ba embaixador no embaixador dehan seidauk iha programa espesifiku ba ida ne’e nia sei eksplora oinsa ko’alia ho governu Australia ba potensia sira ne’e aban bainrua bele explora ida- idak”. Nia hatutan
Governante ne’e salienta, embaixador Australia iha ona programa atu dezenvolve atividade joven sira iha area remota sira.
“Kona-ba kapasidade rekursu humanu atu dezenvolve aktividades sira iha area rurais ka remotas embaixador fo hatene katak agora dadauk sira iha hela programa, sira iha hela program project partisipant ne’ebé maka iha hela prosesu desentralizasaun nian nune’e bele ajuda di’ak liu tan prosesu dezenvolvimemto ba joven sira iha area rurais”. Katak nia
Entretantu nia aumenta tan kona-ba problema ne’ebé juventude Timor hasoru hanesan kestaun laboral no haree ona oinsa prepara joven sira.
“Embaixador mos ko’alia oituan kona-ba formasaun, problema ne’ebé juventude timor oan sira hasoru iha kestaun laboral i Australia haree katak Timor Leste nia foinsa’e bele sai mos forsa laboral ida ba iha ne’eba, sira hanoin mos oinsa atu hahu preparasaun ruma ba ita nia joven sira, prepara sira nia skill tanba merkadu de trabalhu iha ne’eba ezize abilidade, sira hanoin, hakarak mos investe liu ida ne’e mak ohin embaixador briefing informa ba ha’u programa kooperasaun ne’ebe sira hakarak hala’o ho governu Timor Leste”. Nia hakotu
Jornalista: Aquelina Taec & Juvita dos Santos Sarmento
Editor : Luis dos Santos