Estrada Ainaru No Covalima Aat, Produtu Komunidade Fohorem La Folin
SAPNewsTL, Dili, 19/07/2022: Relasiona ho Estrada ne’ebe aat no eletrisidade seidauk lakan iha fatin balun iha Munisipiu Ainaru no Covalima, Deputadu Bankada CNRT José Virgilio Rodrigues Ferreira husu governu atu solusiona problema ne’ebe komunidade hasoru tanba difikulta transporte la tama halo produtu ne’ebe komunidade faan kompanha la sosa
Deputadu Bankada CNRT José Virgilio Rodrigues Ferreira hateten iha Munisipiu Ainaru, iha Postu Administrativu Hatu-Udo, tekniku no kompanha sira ba sukat ona estrada iha ne’eba no hateten katak tau ona iha OJE 2021, atu hadia estrada refere maibe até agora estrada seidauk diak
“Ita nia komunidade sira iha Postu Administrativu Hatu-Udo nian husu ba governu atu tau atensaun ba sira nia estrada ne’ebe mak to’o agora seidauk diak tanba orsamentu ne’ebe mak aprova ne’e boot tebes no tekniku sira mos mai sukat hotu ona maibe to’o agora estrada seidauk diak”. Levanta Deputadu Bankada CNRT José Virgilio Rodrigues Ferreira, iha Uma Fukun PN, 19/07/2022
Entretantu, iha Munisipiu Covalima parte Postu Administrativu Fohorem komunidade preokupa no husu guvernu atu tau matan ba Estrada ne’ebe aat no mos Eletrisidade ne’ebe to’o agora seidauk lakan
“Ita nia komunidade sira labele lori sira nia produtu mai iha merkadu hodi faan tanba deit estrada ne’ebe mak aat halo transporte la bele ba to’o iha sira nia fatin i sira mos atu lori sira nia produtu mai faan ba sexta bazika nian tanba dalan aat fo difikulta ba transporte sira atu ba tula sira nia produtu, la iha kompanha ida mak tama ba to’o iha sira nia fatin hodi sosa sira nia sasan, sira nia produtu husik sai aat no soe estraga deit”. Hateten Deputadu Bankada CNRT José Virgilio Rodrigues Ferreira
Enkuantu, Deputadu Bankada CNRT José Virgilio Rodrigues Ferreira husu governu atu tau atensaun ba problema hirak ne’e no hatan ho lalais
Reporter : Lidia Amaral