Haksesuk Malu Tan Bee-Moos, Komunidade Soibada Keixa SMASA Ba MAE
SAPNewsTL,Manatuto : Hafoin hetan vizita husi Vise Ministru Administrasaun Estatal (MAE) Jacinto Rigoberto, ba Postu Administrativu Soibada munisípiu Manatutu, komunidade Idel fonso Caldeira keixa direita funsionariu Smasa nain rua (2) ba vice Ministru (MAE).
Tuir Idel fonso Caldeira hateten, durante tinan barak ona komunidade uma kain 10 ne’ebé hela iha área rai mutin Suku Manlala, aldeia Manlala Postu Administrativu Soibada munisípiu, Manatuto, obrigadu tenki la’o ho distansia dok hodi ba kuru bee mos hodi bele responde ba nesesidade diária.
Maske iha tinan 2021, governu liu husi Programa Nasionál Dezenvolvimentu Suku (PNDS) implementa ona projetu kanalizasaun be mos liga ba komunidade nia hela fatin, maibé to’o agora komunidade sira seidauk asesu ba bee mós tanba funsionariu Smasa Postu Soibada, abandona serbisu no la kontrolu masimu ba kanalizasaun ne’ebé konstroi husi programa (PNDS).
Hatan ba preokupasaun ne’e, Vise Ministru Administrasaun Estatal (MAE), Jacinto Rigoberto, promete sei toma atensaun ba funsionariu Smasa nain rua ne’ebé destaka iha Postu Administrativu, Soibada hodi kontrolu baze serbisu iha komunidade nia let atu nune’e populasaun sira bele senti satisfaz ho serbisu Smasa iha postu Soibada.
Enkuantu, tuir obrservasaun ne’ebé SAPnews nota iha terenu katak, preokupasaun ne’ebé komunidade suku, Manlala Aldeia Manlala hasolu, realmente kada loron komunidade sira hadau malu kuru be posu ne’ebé inisiativa kria husi komunidade, atu responde ba nesesidade diaria. Maibé dalaruma populasaun sira haksesuk malu tanba hadau malu bainhira be laiha.
Jornalista : Guilhermino Ramos da Cruz