Garante Seguransa Públika, Kalbuadi Husu Estrutura APC Serví Ho Responsabilidade

SAPNewsTL, Díli – Vice Primeiru Ministru no Ministru Kordenador ba Asuntu Ekonómiku, Ministru Turizmu no Ambiente (VPM) Francisco Kalbuadi Lay, enkoraja novu estrutura Autoridade Protesaun Sivil (APC sigla Portugués) atu serbisu ho responsabilidade, hodi promove espiritu unidade no kooperasaun iha institusaun laran.

Vice Primeiru Ministru Francisco Kalbuadi Lay hateten, nia parte enkoraja Prezidente foun Autoridade Protesaun Sivil, komandante operasional, diretor exekutivu, diretor nasionál, no xefi departementu sira atu serbisu hamutuk ho membru estrutura hamutuk 172, ne’ebe foin asume kna’ar hodi garante seguransa públiku, no proteze sidadaun sira-nia moris.

“Ohin maka pasu signifikativu ida iha ita boot sira nia kareira liu- liu ita boot sira ne’e foin asume kargu foun, atu serbisu ho responsabilidade hodi promove espiritu unidade no kooperasau, atu lori enerjia foun ba sosiedade”.Dehan Vice Primeiru Ministru, Fransisco Kalbuadi Lay, liu husi nia diskursu iha, Salaun Delta nova, Sexta (19/07/2024).

Kalbuadi Lay salienta, kna’ar ne’ebe dirijente APC sira simu nu’udar papel importante ida hodi hatutan serbisu sira ne’ebe estrutura anterior hala’o ona, tamba ne’e kargu xefi departementu sira, laos atu haree liu ba sira nia pozisaun, maibé tenki kolabora ho membru sira hotu hodi kontinua serbisu ho responsabilidade atu responde ba krize no situasaun emerjensia sira iha rai laran. Tenik nia

“Ita boot sira nia funsaun laos pozisaun jestaun no lideransa deit maibé ita boot sira hala’o hela papel importante ida ho responsabilidade boot, atu hodi mantein seguransa públiku, koresponde ba krize no emerjensia sira, ita boot sira sei esforsu atu proteze ita nia sidadaun nia moris no prosperizdade, bainhira sosiedade enfrenta situasaun dezastre ruma, nune’e ekipa APC no Bomberios sei servisu makas liu tan, bainhira simu orientasaun husi dirijente sira”.

Governante ne’e fundamenta, Dirijente sira obrigatoriamente hatudu valor lideransa ba membru sira atu serbisu ekipa, buka nafatin orientasaun hodi hatudu dedikasaun, integridade no reziliente, bainhira hala’o intervensaun iha akontese ruma ho responsabilidade no profisionál hodi hatudu ba públiku liga ba kauza balun ne’ebe presija responde husi parte APC, tamba kargu ne’ebe dirijente sira simu maske kna’ar sivil, maibé ho tipu komandante

“Lideransa sira tenki hatudu ba imi nia membru sira hotu, dedikasaun, intergridade no reziliente, hanesan lideransa ou komandante, nune’e komunikasaun mak xavi ba kolaborasaun serbisu ekipa, hodi mantein linha komunikasaun nakloke ba ita nia maluk sira superior no, públiku iha tempu krizi ou dezastre ruma, imi nafatin kontinua buka dalan atu kolabora ho ema hotu-hotu, tantu APC no Bomberios tanba dirijente sira asume kargu komandante iha instituisaun”. Nia sublinha

Nia hatutan, tantu APC ka bomberios tenki kumpri orden iha tempu dezastre, ekipa presija tebe-tebes serbisu ho dedikasaun mak bele responde situasaun dezastre ruma ne’ebe akontese, implika ba ema nia vida, membru sira laiha ema ida mak servisu hasoru dezafiu mesak, maibé ema hotu serbisu hamutuk hodi promove espiritu unidade no kooperasaun, Dehan nia.

“Obrigasaun lideransa ne’ebe efektivu, formasaun importante tebe-tebes, hala’o nafatin exersisiu no treinamentu sira hatudu nafatin ita boot sira nia kualidade nu’udar lider, pratika bei-beik exersisiu sai fasil liu durante emerjensia, tamba ida ne’e atu asegura ema hotu nia vida husi kauza ruma ne’ebe akontese iha baze mai to’o nasionál”.Nia Husu

Entretantu, nomeiasaun kargu diretor, no xefi departementu APC sira ne’ebe asume kna’ar sei hala’o serbisu, durante fulan nen (6) tuir lei funsaun publiku, atu nune’e parte funsaun públika hala’o avaliasaun hodi haree serbisu tomak ne’ebe kargu diretor no xefi departementu sira hala’o.

Jornalista : Dircia Baptista Belo