Presta Omenajem, PR Horta Saudozu “Lu Olo Nia Legadu Moris Ba Nafatin”
Imajem : Presidente Repùblika Jose Ramos Horta Presta Homenagem Ba Eis Presidente Saudozu Francisco Guterres Lu Olo iha Farol, 23/06/2026. Foto : Media PR
Sapnews Pro, Díli : Presidente Repúblika José Ramos Horta presta omenajem ba Eis Presidente Repúblika Saudozu Francisco Guterres Lu Olo no hato’o sentidu kondolénsia ba família enlutada.
“Ohin, ho laran susar no respeitu boot tebes, nasaun Timor-Leste tomak hamutuk simu, maun ida ne’ebé ami hotu respeita, Prezidenti Dr. Francisco Guterres Lu-Olo nia isin”. Hakerek Presidente RDTL Jose Ramos Horta iha nia konta ofisial. Dili,23/06/2026
Saudozu Lu Olo nia isin to’o iha Aeroportu Internasionál Prezidente Nicolau Lobato hosi Kuala Lumpur, no simu ho onra militár aas liu hosi Estadu. Xefe Estadu hato’o nia sentidu kondolénsia ba família liliu faluk no oan sira.
“Lori estadu nia naran, ha’u hato’o kondolénsia kle’an ba nia espoza, Cidália Lopes Nobre Mouzinho Guterres, ba sira-nia oan sira ne’ebé hadomi, ba família boot tomak, ba nia maluk sira iha FRETILIN, no ba nia alin-maun veteranu sira. Maromak fó deskansu nafatin ba nia iha dame rohan laek”. Xefe Estadu sublinha
Ramos Horta hatutan, iha ne’ebe hahú ida, iha mos rohan ida. Prezidente “Lu-Olo” remata ona nia dalan moris iha mundu ne’e, maibé nia legadu sei hela ho ita nafatin hanesan ezemplu korajen, dedikasaun no bondade ne’ebé tenke sai inspirasaun ba jerasaun foun sira.
“Ohin, ita hato’o homenajen ikus ho respeitu boot no dehan adeus ba dala ikus. Maromak fó deskansu ba nia, no nia legadu moris iha Timor-Leste ba nafatin”. Nia hakerek
Saudozu Francisco Guterres “Lu-Olo” moris iha postu administrativu Ossu, munisípiu Viqueque, iha loron 7 Setembru 1954. Saudozu nu’udar veteranu, aswain funu na’in ne’ebe luta ba libertasaun patria iha tempu okupasaun indonezia to’o Timor-Leste hetan ukun rasik an.
Hafoin referendu no iha tempu independénsia, Saudozu sai Prezidente Assembleia Konstituinte iha 2001 no sai Prezidente Parlamentu Nasionál iha tinan 2002-2007.
Iha tinan 2007, Lu-Olo nu’udar Presidente Partidu Frente Revolusionáriu Timor-Leste Independente (FRETILIN) konkorre iha eleisaun prezidensiál ba periodu 2007 to’o 2012, maibé la konsege konkista vitória iha momentu ne’eba.
Tuir mai Iha tinan 2017, Lu Olo kontinua firme hodi kompete no konsege eleitu sai Presidente Repúblika Demokrátika Timor-Leste husi 20 Maiu 2017 to’o 20 Maiu 2022.
Durante nia mandatu, Lu-Olo hatudu nia lealdade, kompromisu no konsisténsia hodi defende no promove unidade nasionál, dialogu nasional, paz, estabilidade polítika, justisa no tau interese povu aas liu interese hothotu to’o mandatu remata.
Hafoin independénsia, Lu Olo hetan konfiansa no mantein lidera Partidu FRETILIN desde 2001 to’o ohin loron 21 fulan Junhu 2026 nia hakotu iis iha Malasia.
Saudozu Francisco Guterres Lu Olo ba ho Maromak, hela ho Maromak no hamutuk ho Maromak hodi sai nafatin tau matan ba povu no rai Timor-Leste. adeus no adeus. obrigadu barak ba dedikasaun tomak.
Foto : Media PR
#luolo #ramoshorta #alkatiri #timorleste
