GXRR Realiza Semináriu, Promove Kultura No Implementa Tara Bandu Iha TL
SAPNewsTL,Dili: Gerente Xanana Reading Room(GXRR) realiza semináriu nasional hodi promove patrimoniu kultural ba joven no estudante sira iha Timor Leste, objetivu husi seminariu ne’e hodi hasa’e, haburas no promove liu tan kultura Timor Leste ba jerasaun vindoura sira.
“Politika nasional ba ita nia kultura Timor Leste nian, patrimonia kultural primeiru ita halo somente ita nia identidade nasional ne’e ba mundu, segundu maka ita halo politika ida prezervasaun, konservasaun, salva guarda ba ita nia patrimonia kultural”. Dehan Sekretariu Estado Arte no Kultura Teófilo Caldas ba jornalista sira iha Uma Mahon Sala Leitura Bidau Licedere-Dili Sexta-Feira,26/08/2022.
Entretantu, Sekretariu Estadu ne’e akresenta guvernu iha ona politika hodi rezistu patrimoniu kultural ba UNESCO.
“Ita iha politika ida atu halo rezistu ita nia patrimoniu kultural ba UNESCO, ami sei servisu makaas tan fali ho komite patrimonia material liuliu hamutuk ho UNESCO Komisaun Nasional Timor UNESCO para oinsa maka ita nia planu 2025-2026 bele rezista fila fali patrimonia ida, ami hanoin hela atu rezista ita nia uma lulik ou muzika tradisional balun mak ita atu rezista tanba ita bo’ot sira hatene Indonesia liuliu iha NTT sira rezista ona tebe liku-rai, tebe liku-rai ne’e nia orijinal husi ita nia rai Timor ne’e sira rezista ona maibé ita espera katak ba oin ne’e ita fali”. Nia teni
Governante ne’e hatutan diresaun arte kultura sei sensibiliza ba komunidade hodi kuñese kultura no promove mos tara bandu hodi reduz mal gastus iha Timor-Leste
“Ita halo sensibilizasaun ba importansia patrimonia kultural entaun liu husi diresaun sira halo sensibiliza ba ita nia Komunidade sira para tenke kuñese saida maka kultura, no ita mos promove tara bandu, ita hatene ko’alia kona-ba kultura mais ita mos promove tarabandu, ba tarabandu ne’e la’os atu halakon kultura tarabandu ne’e par atu redus malgastus por ezemplu ita halo festa perisahan ba uma-lulik ita hateten ba feto-san sira balun lori $2000-3000 dolares ita bele redus ba $500 dolar karau ida ne’e par ninia metade ne’e ba iha setor edukasaun, ita nia oan sira tenke eskola kultura ita prezerva, konserva nafatin mais ita nia oan sira tenke ba eskola para bele aban bainrua lidera ita nia nasaun ne’e”.Nia salienta
Iha fatin hanesan reprezentante Prezidente Gerente Xanana Reading Room Jeronimo Fernandes informa aktividade seminariu ne’e realiza tanba hetan apoiu husi Sekretariu Estadu Protesaun Sivil no Auditoriu Sosial.
“Sala leitura organiza atividade ida ne’e tanba hetan apoiu husi Sekretariu Estado Protesaun Sivil no Auditorio Sosial ne’ebé tutela ba gabinete Primeiru Ministru objektivu atu fo oportunidade ba ita nia joven no foinsa’e sira hodi desenvolve sira nia kunhesimentu kona-ba asuntu kultural, portantu programa ne’e hetan apoiu orsamentu ho total 2000.00 USD”. Nia hatete
Entretantu, estudante Universidade Nasional Timor Lorosa’e Justino Viegas Lopes senti kontenti tebes no apresia ba seminar loron ohin nian tanba bele hetan buat ruma husi ne’e, bele apresenta sira nia kritiku no duvida sira ba iha parte relevante.
Jornalista: Antonio Tilman & Domingas da Conceição
Editor: Ekipa Editorial