EL Matador Lori Atleta Nain-2 Sei Kompete Charity Boxing Event  Iha Austrália

(SAPNewsTL) Dili : Klube Boxing EL Matador lori atleta nain rua Délio A. Mouzinho no Elidio da Conceição kompete iha eventu Australian Centre Territory (ACT) iha Austrália iha fulan setembru tinan ne’e.

“Iha fulan kotuk liu ba ita hetan konvite husi Austrálian Centre Territory (ACT) manda mai klube EL Matador atu lori atleta ba tuir kompetisaun ne’ebe ami simu karta ne’e no ha’u prepara kedas atleta nain rua, Delio A. Mouzinho no Elidio da Conceição atu ba tuir kompetisaun Charity Boxing Event Australia no treinamentu durante semana rua iha Austrália ne’ebe ami nain tolu sei aranka ba Austrália ohin loron no ami sei fila iha loron 14 fulan setembru tinan ne’e”, dehan treinador Abílio O. dos Santos ba jornalista sira iha Dili Sport Benfica, Colmera, Díli segunda (29/08)

Treinador ne’e hatete, atleta nain rua ne’e sira nia preparasaun kontinuasaun tanba tinan Kotuk sira tuir eventu nasional depois sira tama selesaun nasional ne’ebe Délio A. Mouzinho ba kompete Sea Games iha Vietnam hatudu prestasaun lori medalla osan mutin mai Timor-Leste no Elidio da Conceição mos ba treinu fulan rua iha Bali depois sira nain rua fila mai Timor-Leste kontinua treinu to’o agora.

Abilio Fundamenta, sira nia preparasaun prontu ona atu compete, nia fiar katak sira sei hatudu rezultadu diak iha kompetisaun ne’e no sira sei kompete iha klase 52-54 kg no  71 kg.

“Ita nia atleta nain rua nia preparasaun ba mentalidade, fiziku no tekniku ne’e ita nia atleta sira prontu ona atu kompete iha kompetisaun ne’e iha Australia ne’ebe ita nia Atleta Délio A. Mouzinho sei kompete iha klase 71 kg no Elidio da Conceição sei joga iha klase 52-54 kg ne’ebe  ha’u fiar katak ita nia atleta sira sei hatudu jogu diak no sei halo buat ruma iha Australia”. Nia hatete

Abílio dehan, sira ba Austrália ne’e klube EL Matador  hetan apoiu finanseiru husi SEJD, empreza lokal no nasional sira

“Ami ba Austrália atu kompete eventu ne’e, ami  hetan apoiu finanseiru husi governu liu husi SEJD  ho montante 1,500 USD hamutuk ho empreza lokal no nasional sira ne’ebe finansia sira nia viajen no akomodasaun iha Australia durante semana rua”. treinador informa

Jornalista : Augusto dos Santos

Editor       : Ekipa Editorial