HADEZTA Distribui Sertifikadu Ba Graduadu Na’in 44

SAPNEWSTL, Dili: Sentru Formasaun Haburas Dezenvolvimentu (HADEZTA) distribui sertifikadu ba forma nain-44 tanba remata ona sira nia kursu ingles baziku.

“Ita nia graduadu nain-44 mak ohin simu sertifikadu, durante ne’e hala’o ona kursu lingua Ingles fulan tolu nia laran, sertifikadu sira simu bele loke sira nia hanoin no bele transforma sira nia an, tamba maioria agora ho era ida milenial ema hotu koalia lian English, no lian ema hotu bele uza iha rai laran ou rai liur”.

*Sertifikadu sira hetan ne’e Ha’u hakarak sira aprende kontinua hodi bele loke oportunidade ba sira nia an rasik karik aban bainrua sira servisu iha rai laran karik presija sira, no mos iha rai liur karik sira iha sorti ruma, maske formasaun ne’e fulan tolu deit maibe bele aumenta formandu sira nia kapasidade, husu sira atu kontinua nafatin atu aprende, tamba sira nia future sei naruk, sira mos presija atu hadia sira nia kualidade aprende”,dehan Diretor HADEZTA Francisco de Araujo ba Jornalista Sira iha Dili, 01/07/2023

Diretor ne’e mos hatutan, iha sentru ne’e loke kursu ne’e lian ingles, portuges, korea, japaun, Administrasaun, jornalizmu no mos Komputador, maibe ohin loron 1 fulan jullu 2023 distribui deit sertifikadu ba estudante sira ne’ebe husi kursu lian Ingles baziku, entre graduadu ne’e hare husi jeneru feto mak barak liu mane.

Iha fatin hanesan, formandu Justina Gonsalves informa, nu’udar estudante ida husi sentru formasaun HADEZTA sente orgullu ba nia an rasik no agradese mos ba formador sira hotu ne’ebe mak durante fulan tolu nia laran eduka ona nia.

“Ha’u hanesan estudante ida hau rasik sente kontenti tebes tanba bele hetan ona sertifikadu, Ha’u haksolok tebes bainhira hetan valor diak ba kursu lian Ingles baziku, Ha’u halao ona kursu iha sentru formasaun HADEZTA durante fulan tolu nia laran treinardores sira mos hanorin ho maneira ne’ebe diak tebes, fo suporta ba ami nia estuda, maske ho durasaun aprende oras rua nia laran hahu husi tuku tolu loraik too tuku lima loraik, husi segunda to’o sexta”, tenik Justina

Justina haforsa tan, hakarak aproveita tempu hodi aprende lian ingles tanba joven mak airin ba nasaun, “se Ha’u lahatene buat barak, liuliu lian ingles hanesan lian ida ne’ebe internasional, oinsa mak bele sai airin ba nasaun bainhira seidauk prepara an diak, tan ne ‘e hakarak aumenta Ha’u nia kapasidade ba futuru”.

Reportajen: Anina Martins