Hakarak Lori Naroman Ba Povu, MAE Lansa UNP Iha Dili
Imajem MAE Miguel Pereira de Carvalho hala’o lansamentu fatuk dahuluk ba uma naroman ba povu iha aldeia Lenuk, Dili segunda 13/02/2023
SAPNewTL, DILI – Ministériu Administrasaun Estatal (MAE) hala’o lansamentu fatuk dahuluk ba programa Uma Naroman ba Povu (UNP) Plus A no B iha Munisipiu Dili.
“Ita halo lansamentu Uma Naroman ba Povu (UNP) ne’ebé nia orsamentu aloka ona iha tinan 2022, ba total UNP hamutuk ualu-nolu 80 ba Munisipiu Dili tomak, ida ne’e kontinua nafatin hanesan parte ida husi programa oitavu governu konstituisional nia hodi kumpri mandatu konstituisional RDTL ne’ebé mak preve, ita nia populasaun sira tenki goza direitu abitasaun direitu ba fatin ne’ebé dignu”, dehan MAE Miguel Pereira de Carvalho ba jornalista iha aldeia Lenuk, Dili segunda 13/02/2023
Ministru haktuir, Durante ne’e governu konstrui UNP ba de’it suku ne’ebé sai husi Munisipiu Dili, Maibé Dili uluk halo de’it iha Atauro ho Metinaru ho hanoin ida katak povu sira presiza hahu hatur iha fatin ne’ebé dignu atu bele lori naroman ba sira, inisiu ida ne’e hakarak lori naroman ba povu, governu konstituisional hahu ona UNP tama mai Dili, maibe halo ona uma ualunulu iha Dili laran no kontenti tebes tanba autoridade lokal sira konsege identifika benifisiariu sira ne’ebé mak defaktu presiza duni uma ida ne’e.
MAE Miguel Pereira de Carvalho
Nia esplika, infelizmente populasaun iha Timor laran tomak por volta 200.000 familia mak ladun iha kondisaun, maibé i mandatu ikus oitavu governu só bele halo UNP hamutuk 10.000, tanba ne’e, populasaun barak mak sira nia kalen aat ka fruzu hotu ona entaun governu ajuda sira hodi fahe kalen deit ba komunidade sira atu nune’e sira bele hela iha uma ne’ebé dignu.
Iha fatin hanesan, Sekretaria Ezekutiva PNDS Claudia Soares Pinto hatete, kondisaun sosial sai fator determinante ida ba implementa atividade ne’e preokupasaun boot iha Dili mak estatutu rai rasik
“Kondisaun sosial mos hanesan fator determinante ida ba ita implementa aktividades ne’e, preokupasaun boot tebes iha munisiupiu Dili mak estatutu rai ne’e rasik, difisil tebes ita atu bele hetan benifisiariu sira bele prense duni rekezitu, tanba bainhira ita rejista benifisiariu sira estatutu rai mak sai polemika tebes atu garante ita nia benifisiarius bele hetan UNP,” nia esplika.
Sekretaria PNDS husu ba benifisiariu sira ba plus B nian ne’ebé simu ona kalen, tenki kontribui mos ba programa ida ne’e, governu distribui ona ona kalen benifisiariu sira tenki hola pregu, nune’e mos husu ba benifisiariu simu ona tenki uza labele fa’an fila fali, atu nune’e programa ida ne’e la’o diak hodi nune’e governu tuir mai bele kontinua nafatin programa ida ne’e.
Iha biban ne’e mos, benifisiariu Novianos de Fátima husi suku Kamea agradese ba parte governu, tanba governu bele ajuda ona sira no husu governu kontinua nafatin programa ne’e
“Ami agradese ba parte governu, tanba governu bele ajuda ona no ha’u husu ba governu atu labele to’o iha ami deit maibé kontinua nafatin ba maluk sira ne’ebé mak persiza governu nia tulun”, tenik Novianos
Enkuantu, iha suku Kamea Uma Naroman ba Povu (UNP) plus A benifisiariu na’in 3 mak hetan no ba Plus B benifisiariu hamutuk 37, hafoin ida ne’e, MAE kontinua halo lansamentu ba UNP plus A hamutuk 4 no plus B hamutuk 37, ba aldeia 27 iha Suku Bairo-Pite postu administrativu Dom-Aleixo Munisipiu Dili .
Jornalista: Antonio Tilman