IGEADI Sei Normaliza Estrada Diresaun Luro

SAPNewsTL, Lautém : Relasiona ho Estrada diresaun Postu Administrativu Luro, Munisipiu Lautém iha area Suku Afabubo ne’ebe ameasa kotu, Administrador Luro Augusto Ramos Branco informa nia parte hetan ona kontaktu husi IGEADI hodi normaliza iha tempu badak.

Iha intervista, Administrador Postu Administrativu Luro Augusto Ramos Branco hateten, nia parte hetan ona kontaktu husi Institutu Gestaun Ekipamentu ba Apoiu Dezenvolvimentu Infraestrutura (IGEADI) katak IGEADI sei normaliza estrada refere iha tempu badak.

“Estrada Area Afabubo diresaun Postu Administrativu  Luro ne’ebe ameasa kotu, ohin ita hetan ona kontaktu husi IGEADI katak sira sei mai normaliza iha tempu badak, tanba estrada ne’e sofre erozaun no mota sobu”. Tenik Administrador Postu Luro Augusto Ramos Branco ba SAPNewsTL iha nia knaar fatin, Luro, 31/12/2023.

Administrador Postu Administrativu Luro Augusto Ramos Branco husu ba parte relevante liliu Ministériu  Obras Públikas (MOP) hodi tau atensaun urgente tanba iha posibilidade boot estrada refere bele kotuk wainhira akontese tan udan boot.

“Nu’udar  Administrador Postu Luro husu ba MOP hodi tau atensaun seriu ho urgente tanba estrada refere iha posibilidade boot bele kotu kuandu la halo normalizasaun lais no hadia ho diak”. Augusto Ramos Branco sublinha

Daudaun ne’e, estrada refere ameasa kotu tanba kada loron sempre akontese udan boot, iha ne’ebe kontribui mos ba mota ho korreta ne’ebe forte hodi sobu rai ne’ebe kaer estrada iha area refere.

Wainhira karreta liu, passajeiru sira sempre tun hodi dada karreta molok atu ultrapasaa estrada refere tanba rai ho forma tahu halonkarreta nia eoda sempre belit metin, agora daudaun karreta truck ida mak sei mout hela iha ne’eba.

Entretantu, Daudaun ne’e kompanha ida halo ona moru protesaun hodi proteze estrada refere maibe iha semana kotuk udan ikus mai mota sobu, maske nune’e maibe kompanha refere kontinua halo ninia moru protesaun  (Gabiaun) hodi proteze estrada refere husi mota no rai-monu.

Hafoin, Notisia ne’e tun, SAPNewsTL seidauk halo komfirmasaun ho Ministériu Obras Públikas, maske nune’e, maibe Institutu Gestaun Ekipamentu Apoiu Dezenvolvimentu Infraestrutura (IGEADE) sei halo normalizasaun ba estrada refere iha tempu badak.

Jornalista : Etelvina dos Santos