UNTL Realiza Semináriu Sientífika, Armindo Konsidera TL Falta Livru, Biblioteka no Peskija

SAPNewsTL, Dili:  Universidade Nasional Timor Lorosa’e liu husi Asosisaun Akadémiku Departamentu Formamação dos Profesores Para Ensino Básico realiza Seminariu Sientífiku, Dosente Formadu Direitu ISFIT Armindo Moniz Amaral husu estudante sira tenki estuda maka’as no lê referénsia barak hodi hasa’e kualidade.

Tuir Dosente Formadu Direitu ISFIT Armindo Moniz Amaral katak Problema baziku ne’ebe estudante universitario sira hasoru mak menus fasilidade, la’os de’it fatin  maibé Professor sira mos menus espesializadu iha nia área

  “Agora livru mos laiha, biblioteka mos uituan de’it, peskiza mos laiha, ida ne’e ha’u hanoin sai impaktu ba rai ida ne’e no tinan naruk oin mai, ita mos presiza hasai de’it literasia prepara livru ba dezeñu kualidade ne’ebé di’ak liu no ikus mai ita bele iha mehi ona atu iha tan jerasaun intelektual ida ne’ebé kualifikadu liu”. Dehan Dosente Formadu Direitu ISFIT  Armindo Moniz Amaral, iha Auditorium Liceu UNTL Sábadu, 17/09/2022.#

Dosente ne’e mos sujere ba estudante universitariu sira iha rai laran tomak atu estuda referénsia ne’ebé kualidade no dixiplina iha tempu barak liu estuda ho los, lê referénsia ne’ebé natón.

“Luta libertasaun ida ne’e, tula iha ita nia kabás atu bele to’o iha mehi, objektivu rai ida ne’e presiza  luta ne’ebé naruk ho enerjia ne’ebé bo’ot tebes entaun ita presiza armatiza ita nia an ho lê halo leitura ne’ebé alternativu natón ba luta libertasaun ida ne’e”. Dosente ne’e hatutan

iha fatin hanesan Prezidente Asosisaun Akadémiku Departamentu Formamação dos Profesores Para Ensino Básico Vasco Ximenes hateten objektivu husi aktividade ne’e atu kardeniza no hasa’e kuñesimentu  estudante sira  nian.

“Ami mai ho hanoin ida estudante hotu ne’ebe mak aprende iha aktividade kurikular ida ne’e la naton, ita presiza hasa’e estudante sira nia kuñesementu liu husi aktividade kurikular mak hanesan ami halo hela atividade Semináriu Sientifíku  maibé la to’o ba iha ne’e de’it no mos sei iha aktividade seluk tan mak sei tuir mai”. Nia informa

Entretantu, partisipante ba semináriu sientífiku ne’e, estudante Nelson Martins haktuir aktividade ne’e interesante tebes nune’e nia husu ba estudante hotu labele lakon oportunidade ida ne’e, hodi bele hetan buat foun ida no hodi sai estudante ne’ebé di’ak hodi dezenvolve nasun ida ne’e.

“Lisaun ida ohin ne’ebé aprende iha aktividade ne’e, estudante tenki kreativu ba nia an rasik, kontribui hodi  dezenvolve País ida nee, etudante tenke involve sira nia an iha aktividade hotu-hotu hodi kontribui ba paz no estabilidade, sai liman ain povo nian iha estadu direitu demokrátiku ida ne’e”.nia dehan

Enkuantu, aktividade semináriu sientífiku ne’e organiza husi Asosiasaun Akadémiku Departamentu Formamação dos Profesores Para Ensino Básico, Faculdade Artes e Huminidades, UNTL no hetan partisipa husi estudante UNTL rasik hamutuk ho reprezentante universidade sira seluk.

Jornalista: António Tilman

Editor: Luis Pailofo