Jesus no Maria Tama Ba Bee-Matan Leo-Telo, Inspira Crisca Hari’i Gruta

SAPNewsTL, Ainaro : Tuir Matadalan Grupu Orasaun Crisca Sr. Joao da Silva Pereira haktuir  Gruta Jesus do Bom Pastor Leo-Telo iha ninia istoria ne’ebe maka akontese iha tinan 2009 ba Matadalan Grupu ho ninia Grupu ne’ebe maka ba Reza iha Fatin ne’eba, sira haree Jesus tun husi lalehan tama ba bee laran

“Wainhira hari’i Gruta ne’e iha Nia istoria, iha momentu ida Ha’u lori Grupu husi Dili, Grupu Orasaun Crisca hamutuk mai reza iha ne’e no uluk liu Gruta mos la iha, iha bee deit, bee ne’ebe mak kiik oan los, tuir kustume grupu ami nian, Reza tenki Taka matan, wainhira reza, Reza seidauk hotu iha kolega ida ne’ebe maka senti la hakmatek no hakarak loke nia matan, Nia loke matan hetan Jesus tun husi lalehan ba Tama iha bee ne’e nia laran depois kolega ne’e halai ba foti nia Telefone hodi hasai foto no Ami hare iha duni Jesus nia lalatak iha bee laran”. Dehan Sr. Joao ba jornalista Sira iha Fatin Leo-Telu Ainaro,Sábadu, 08/10/2022.

João hatutan, komunidade Sira iha Fatin Ida ne’e mos hetan Nain feton ho Jesus mosu iha Fatin ne’eba, entaun iha tinan 2014 Grupu Crisca Sira mos iha inisiativa rasik hakarak hari’i Gruta hodi fo Naran GRUTA JESUS DO BOM PASTOR.

“Komunidade Sira ne’ebe iha ne’e Sira mehi beibeik Sempre mosu  iha fatin ne’e Nain Feton ho Jesus, komunidade sira mos hetan naroman husi ne’eba, entaun ho esperiensia lubuk ida ne’ebe akontese maka Ami iha Grupu orasaun Crisca enkontru hamutuk tau ideia ho laran tomak hamutuk  hodi hanoin hari’i Gruta Ida ne’e hodi fo naran GRUTA JESUS DO BOM PASTOR”. Nia informa

Enkuantu, Gruta Jesus Do Bom Pastor refere inaugura direita husi Sua Eminénsia Dom Virgilio Cardeal do Carmo da Silva iha loron 08 Outobru 2022, iha ne’ebe hetan partisipasaun maksimu liu rihun tolu resin husi sarani sira iha Suku Leo-Telo

Jornalista : Justino Soriano de Jesus

Editora      : Antonina Lopes Da Silva