João Baptista : Festival Fronteira Fo Benefisiu Ba Komunidade
SAPNewsTL, Bobonaro: Komunidade Maliana João Baptista Cardoso hatete, sente governu liu husi Sekretáriu Estadu Arte Kultura (sigla portuges SEAC) ho Centro Nacional Chega Instituto Publiku (CNC, IP) tanba realiza Festival Fronteira 2023 iha Postu Administrativu Maliana no fo benefisiu diak ba komunidade munisipiu Bobonaro.
“Ita nia governu sentral liu husi Sekretáriu Estadu Arte Kultura (sigla portuges SEAC) ho Centro Nacional Chega Instituto Publiku (CNC, IP) realiza Festivál Fronteira 2023 durante loron haat nia benefisiu bo’ot tebes duni mai Maliana oan sira tanba ita nia negosiante kiik, restorante sira no hotel iha Maliana nakonu hotu tan ne’e ita hetan rendimentu bo’ot tebes husi partisipante mai husi Timor-Leste no NTT, Indonesia”, dehan komunidade Maliana João Baptista Cardoso ba jornalista sira iha resintu jinajiu munispal Maliana, Bobonaro sesta (17/11/2023).
João hatutan, nia sente orgullu tebes nu’udar sidadaun, Maliana oan sai uma nain ba festivál fronteira ne’e, governu halo servisu hamutuk ho autoridade husi Nusa Tenggara Timur (NTT) ho objetivu hametin rekonsiliasaun tanba Timoroan barak sei hela iha NTT.
Festivál ne’e importante tebes ba timor oan ne’ebé sei hela iha iha kupang, Atambua, kefa, Belu para atu halo rekonsiliasaun kulturál atu hametin nafatin amizade no fraternidade umana tanba lisan no kultura sei kesi metin.
Komunidade ne’e informa tan, governu esforsu makas para tinan ida rua mai tan Timoroan bele simu malu ho maluk sira hela iha NTT tanba komunidade sira hela iha fronteira ne’e hare’e malu diak nanis
Tan ne’e sira husu ba nai ulun sira rekonsiliasaun ne’e importante tebes Timoroan sira nomos ba maluk sira ne’ebé sei hela iha mota sorin, ema sira mak ohin loron mai partisipa Festivál Fronteira ne’e maske sira jerasaun daruak no datoluk ona maibe sira nia partisipasaun mai tuir prosesu rekonsiliasaun ne’e atu hotu lalais.
Nia afirma tan, nia husu ba nai ulun sira futuru mai kontinua realiza iha NTT no iha munisípiu Covalima ho Rejiaun Administrativa Espesiál Oe-cusse Ambeno (RAEOA) tanba munisipiu rua ne’e inklina an iha liña fronteira.
Reportajen: Augusto dos Santos