Jogu CPLP 2024 Realiza Iha TL, SEJD Hahú Halo Preparasaun
SAPNewsTL,Dili: Sekretariu Estadu Juventude Desportu ( SEJD) hahu halo preparasaun ba jogu Comunidade dos Paizes Lingua Portuguesa ( CPLP) 2024 iha Timor-Leste iha ne’ebe komesa bolu ona federasaun sira halo reuniaun no preparasaun sira hodi kompete tanba Timor-Leste mak sai uma nain ba jogu refere.
“Ita halo enkontru ho parte federasaun sira hodi ko’alia kona ba preparasaun jogu CPLP 2024 iha Timor-Leste ne’ebe Ita hotu hatene katak jogu CPLP 2020, ita mak sai uma nain maibe akontesimentu kovid-19, entaun muda fali 2024, iha fulan outubru tinan ne’e ita sei ba reuniaun iha Cabo Verde hodi halo konferénsia ho ministériu juventude desportu liga ba númeru atleta ne’ebe ita propoin iha 2019”, Diretor Nasional Desportu João Rodrigues ba jornalista iha edifisiu SEJD, Lecidere, Dili tersa (24/08/22).
Nia aumenta, iha 2020 sira tau ona orsamentu ba modalidade sira atu partisipa jogu ne’e no Timor-Leste iha kapasidade ona atu nasaun sira iha CPLP mai halo kompetisaun liga ba alojamentu, transporte no alimentasaun tan ne’e sira sei halo konfirmasaun iha Cabo Verde
Diretor Nasional ne’e hatutan, orsamentu ba atividade ne’e sira tau ona iha orsamentu jeral 2023 nian no Timor-Leste prontu sai uma nain ba jogu CPLP 2024 tanba modalidade sira ne’ebe kompete bazeai ba fasilidade iha nasaun ne’e.
“Orsamentu ba atividade ne’e, iha orsamentu 2023, Ita tau ona tanba ita deside modalidade ualu ka sia inklui atletizmu paralimpiku ne’ebe iha 2023 Ita sei halo kampionatu nasional ba Ita nia atleta ho idade 15 to’o 16 ne’e para iha 2024 ita nia atleta prontu ona halo kompetisaun, Estadium Munisipal Dili hein finalizasaun, tenis kampu no voleibol praia mos hadia tiha ona, molok sai uma nain ba jogu CPLP 2024 ita sei hadia tan fasilidade balu”. Hatete nia
Entretantu, Prezidente Federasaun Taekwondo Timor-Leste Gabriel da Costa hatete, objetivu hasoru malu ho SEJD ko’alia kona-ba preparasaun ba jogu CPLP 2024 iha Timor-Leste ne’ebe federasaun sei halo selesaun ba atleta júnior sira
“Objetivu ba ohin loron hasoru malu ho SEJD ko’alia kona-ba preparasaun ba jogu CPLP ne’ebe Timor Leste Mak sai uma nain iha 2024, SEJD Konvida federasun 8 ou 9 ne’ebe atu partisipa jogu ne’e mai atu nune’e ba identifika atleta sira, ami husi modalidade taekwondo no ohin haree atleta sira ne’e junior deit ne’ebe ami nia federasaun sei halo selesaun ba ida ne’e”. tenik Gabriel
Iha fatin hanesan prezidente federasaun atletizmu Timor-Leste Afranio Amaral Xavier dehan, jogu CPLP lidera husi SEJD ne’ebe sira sei halo selesaun ba atleta sira husi munisipiu sira hodi aprezenta ba SEJD
“Jogu CPLP ne’e SEJD mak lidera, Timor-Leste sai uma nain ba iha jogo CPLP ne’ebe ohin ami halo reuniaun ho parte SEJD, ami sei halo selesaun ba atleta juvenil sira ne’ebe to’o iha 2024 atleta sira tenki idade atinji ona ba iha 16, Ami sei Fila fali ba prepara fali ami nia atleta no foin dadauk liu ami identifika deit atleta 2 ou 3 deit no mos ami sei rekolla dadus sira ne’ebe mai husi munisipiu no Dili hodi apresenta ba SEJD”. Afranio informa
Reportajen : Antonio Tilman
Editor : Ekipa Editorial