Kampiaun Iha Divizaun Daruak ! Maudoko Sei Kontrata Jogador Estranjeiru
SAPNewsTL, Dili: Maudoko FC sai kampiaun divizaun daruak Liga Feto Timorense époka 2023, nune’e klube ne’e sei kontrata jogador estranjeiru kompete divizaun dahuluk Liga Feto Timorense epoka tuir mai.
“Tinan ida ne’e, klube Maudoko FC sai kampiaun iha divizaun daruak Liga Feto Timorense époka 2023, tan ne’e sae ba fali divizaun dahuluk iha epoka tuir mai, ha’u sei koalia ho treinador hodi prepara jogador sira diak liu tan no rekruta tan jogador estranjeiru ida rua hodi reforsa ekipa hamutuk ho hau nia jogador sira agora tanba jogu divizaun dahuluk jogu divizaun dahuluk ritmu as”, dehan Prezidente Maudoko FC Taquino Soares ba jornalista sira iha nia rezidensia Delta 1, Dili segunda (05/02/2024).
Prezidente hatutan, nia sente orgullu nia klube sai kampiaun divizaun daruak Liga Feto Timorense époka 2023 no nia klube konsege fila fali ba divizaun dahuluk Liga Feto Timorense époka tuir mai.
Iha fatin hanesan, treinador Maudoko FC Jeca Sarmento hatete, ekipa sai kampiaun laos nia sente satisfeitu ona maibe ne’e hanesan inisiu ida nia, husu nafatin ba jogador sira kontinua aprende barak liu tan tanba divizaun dahuluk mai ne’e laos fasil hanesan divizaun daruak.
“Ha’u nia ekipa sai kampiaun laos ha’u sente puas (satisfeitu ona) maibe ne’e hanesan inisiu ida, ha’u husu nafatin ba jogador sira kontinua aprende barak liu tan tanba divizaun dahuluk mai ne’e laos fasil hanesan divizaun daruak agora ne’e” tenik Jeca
Treinador salienta tan, durante ne’e nia fo aprende barak ba jogador sira kona ba finalizasaun liuliu ba avansadu sira tanba ne’e nia koalia ba jogador sira kuandu hetan oportunidade tenke aproveita kedas hodi marka golu tanba oportunidade ne’e laos mai dalabarak no hetan konfiansa hosi superior Maudoko FC sai treinador prinsipal ba klubu ne’e nia sente ne’e servisu todan ba nia tanba treinu jogador feto ne’e sira nia abilidade diferente tebes ho mane maibe ho esforsu tomak mak sira halo susesu, hetan rezultadu pozitivu hodi sai kampiaun.
“Ha’u rekunhese katak ekipa sei falla iha buat barak tanba ne’e ami sei esforsu hodi servisu makaas liu tan, ha’u hanoin antes tama ba divizaun dahuluk epoka tuir mai hahu, ami sei hadia jogador sira nia fiziku, kontrolu no pasa bola ne’e, ha’u mos hato’o ona prezidente klube atu aumenta tan jogador estranjeiru ho mos jogador lokal balun hodi haforsa ekipa”, Jeca hateten
Entretantu Maudoko FC susesu sai kampiaun hafoin rekolla pontu 24 husi jogu dala 8 mak sira hala’o iha divizaun daruak Liga Feto Timorense 2023, susesu marka golu hamutuk 89 no konsege hadau mos mellor markador liu husi Nilda Romana ho total golu 30.
Reportajen: Augusto dos Santos